Verðstríð á jólabókamarkaði og hátt í þre­faldur verð­munur

Þetta kemur fram í tilkynningu frá verðlagseftirliti Alþýðusambands Íslands um niðurstöður úttektar á verði jólabóka, spilum og leikföngum hjá verslunum nú í aðdraganda jóla. Mikill munur reynist á verði bóka, ekki aðeins á milli dagvöruverslana og bókabúða, heldur einnig bókabúða á milli. 

„Langstærsta bókaúrvalið var hjá Forlaginu, Bóksölu stúdenta og hjá Eymundsson, með um 750-800 bækur til skoðunar í þessari könnun. Næst komu dagvöruverslanirnar Bónus, Nettó og Hagkaup með 170-200 bækur. Rúmlega 60 bækur voru til í A4, helst barnabækur, og um 30 í Nexus. Þessi samanburður endurspeglar ekki í öllum tilfellum vöruúrval verslananna í heild, heldur fjölda bóka sem voru samanburðarhæfar,“ segir meðal annars í tilkynningunni, en taflan hér að neðan, sem tekin er saman af ASÍ, sýnir muninn á verði bóka eftir verslunum.

Skoðaðir voru átta hundruð titlar hjá Eymundsson, en úttektin leiddi í ljós að í 25 tilfellum var bókin ódýrust hjá versluninni. Að jafnaði var verð bóka þó í dýrari kantinum hjá versluninni. „Til dæmis fékkst bókin Maðurinn með strik fyrir varir þar á 1.999kr, en hún kostaði 5.490kr hjá Forlaginu. Aftur á móti seldi Forlagið Ást Múmínálfanna á 999kr, en hún kostaði 2.599kr hjá Eymundsson,“ segir í dæmi ASÍ um verðsamanburð.

Þá bauð Bóksala stúdenta bókina Björn Pálsson: Flugmaður og þjóðsagnapersóna á 2.995 krónur, en sama bók kostaði 8.599 krónur hjá Eymundsson. Þá kostar bókin Allt um heilsuna: Hugmyndir og góð ráð fyrir lífið sjálft 2.295 krónur hjá Bóksölu stúdenta en ekki nema 990 kónur í Eymundsson. Bókin seldist hins vegar upp hjá Forlaginu þar sem hún kostaði 890 krónur. Þannig sýna dæmin að raunverulegur verðmunur getur verið frábrugðinn því sem meðalverð gefa til kynna.

Nokkra bókatitla mátti einnig finna hjá Costco, sem ýmist voru dýrari eða ódýrari en í öðrum verslunum. Hins vegar er tekið fram að lítið úrval hjá Costco geri það af verkum að meðaltöl veiti takmarkaðar upplýsingar.

Skoðuðu tvö hundruð titla hjá dagvöruverslunum

Verðlagseftirlitið skoðaði verð bóka hjá þremur dagvöruverslunum, Hagkaup, Nettó og Bónus. „Verðstríð á jólabókum hefur verið í gangi milli Bónus og Nettó og er vart sjónarmunur á bókaverði verslananna tveggja; Í Bónus voru bækur að meðaltali 0,03% dýrari en lægsta verð og í Nettó 0,3%. Í Hagkaup var verð á bókum að meðaltali 12% hærra en lægsta verð,“ segir í tilkynningunni.

Einnig var gerð verðlagsúttekt á spilum hjá verslununum og leiddi úttektin í ljós að Bónus bauð lægsta verðið í flestum tilfellum, en þar er úrval aftur á móti takmarkað. 

„Aðeins fundust 17 spil til samanburðar þar en 52 spil voru skoðuð í Spilavinum, 45 í Hagkaup, 42 í Nexus og ELKO, 30 í Margt og mikið, 29 í A4, 25 í Leikfangalandi og 11 í Eymundsson. Aftur er vert að taka fram að þetta eru ekki öll spilin sem fást í umræddum verslunum – úrvalið getur eðlilega verið mun meira, en hér var sjónum beint að þeim spilum sem finna mátti víðast. Í Leikfangalandi voru spil að jafnaði dýrust, eða 42% dýrari en þar sem þau voru ódýrust. Í A4 voru spil mun hagkvæmari kaup en bækur, eða um 8% dýrari en þar sem sömu spil voru ódýrust.“

Loks var borið saman verð á Legó-leikföngum hjá fimm verslunum, það er Hagkaup, Coolshop.is, Leikfangalandi, Costco og Kubbabúðinni. Í flestum tilfellum var verð lægst í Hagkaup og næstlægst í Kubbabúðinni.