Í stjórnarsáttmálanum er að finna ýmsar tillögur er varða velferðarkerfið og bætur eigi að hækka í samræmi við launavísitölu. Það hefur verið gagnrýnt að engar upphæðir eru í stjórnarsáttmálanum.

Kristrún segir formennina hafa skoðað það hvað tillögurnar kosta og þær hafi hugmynd um hvað geti verið raunhæft. Það sé að hennar mati ekki eðlilegt að birta slík smáatriði í svona stefnuyfirlýsingu.

„Þetta er samkomulagsatriði okkar á milli og það mun blasa við strax í fyrstu fjármálaáætlun hvernig landið liggur og líka þegar þingmálaskráin kemur fram,“ segir Kristrún.

Það sé samt alveg skýrt líka að ríkisstjórnin ætli ekki í nein sérstök útgjöld á árinu. Þau ætla að vinna eftir núverandi fjárlögum þó þau eigi við einstaka atriði. Það sé einhugur um að ná niður verðbólgu og vöxtum og forgangsatriða mál. Ríkisstjórnin hafi tíma til að skoða og setja sér pólitísk markmið.

Verði að finna rétt viðmið

Hvað varðar lífeyri og að hann hækki í takt við launavísitölu segir Kristrún að það verði að finna út hvaða launavísitölu verði miðað við. Það liggi fyrir að ákveðnar greinar laga um almannatrygginga kveði á um að framkvæmdin eigi að vera með þessum hætti. Að bæturnar eigi að fylgja launavísitölu eða verðbólgu, hvort heldur sem hærra er.

„Þessi ríkisstjórn hefur einfaldlega skuldbundið sig að fara að lögum,“ segir Kristrún. Það eigi svo eftir að finna út úr því hvaða sé best að miða við svo það sé réttlátt og raski ekki ró á almennum vinnumarkaði. Það muni um 100 þúsund krónum á þessum bótum og lægstu laununum og segir Kristrún að sú kjaragliðnun geti ekki haldið lengur áfram.

Einhugur um að samþykkja bókun 35

Kristrún segir ríkisstjórnina ætla að einbeita sér að því að samþykkja bókun 35. Ráðherra ætli að leggja fram bókunina og það sé einhugur að samþykkja hana. Það sé mikilvægt að gera það og til lengri tíma sé mikilvægt að virða samning við evrópska efnahagssvæðið. Þessu muni eflaust fylgja miklar umræður en það sé einhugur innan ríkisstjórnar að fara þessa leið.

Kristrún segir það liggja fyrir að lög um hvalveiðar eru úrelt. Þau verði tekin fyrir í atvinnuvegaráðuneytinu á kjörtímabilinu. Það hafi ekki verið útrætt hvernig það verði gert en það ligggi fyrir að það þurfi að endurskoða þau.

„Þetta er eitthvað sem við þurfum að skoða. Þetta er byggt á núverandi lögum,“ segir Kristrún spurð hvort hún ætli að afturkalla núverandi leyfi til hvalveiða. Hún segir skipta máli fyrir atvinnuvegi landsins að það sé fyrirsjáanleiki og það sé ekki verið að grípa fram fyrir lögin.

„Við viljum gera hlutina rétt en þetta er eitthvað sem verður skoðað í ríkisstjórninni.“

Vonar að þing geti komið saman í janúar

Kristrún vonar að þing geti komið saman í janúar. Hún segir ríkisstjórn stefna að því að leggja fram frumvörp um leið og þing kemur saman.

Hún segir að það verði gerðar lítils háttar breytingar á fjárlagafrumvarpinu og nefnir sem dæmi fjármagn til meðferðarúrræða. Það séu ekki háar upphæðir í stóra samhenginu en skipti margar fjölskyldur í landinu miklu máli.