Biden stöðvar japanska yfir­töku á US Steel

BBC greinir frá þessu. Nippon Steel er fjórði stærsti stálframleiðandi heims, en í desember árið 2023 náðust samningar um að fyrirtækið myndi kaupa US Steel fyrir meira en fjórtán milljarða bandaríkjadollara. US Steel hafði þá verið í leit að kaupanda síðan í ágúst á því ári, og neitað smærra tilboði frá öðru bandarísku fyrirtæki.

US Steel var stofnað árið 1901, en fyrirtækið var eitt stærsta fyrirtæki heims þegar best lét, og bandarískur iðnaður var í hæstu hæðum. Undanfarna áratugi hefur styrkleiki fyrirtækisins dvínað vegna mikillar erlendrar samkeppni, þar sem framleiðslan er ódýrari.

Stéttarfélagið mótfallið sölunni

Stéttarfélag stáliðnaðarmanna hefur frá upphafi verið mótfallið sölunni til Nippon Steel. Í viðtali við BBC árið 2023 sagði forsprakki þeirra að salan væri birtingarmynd þeirrar græðgi og skammsýni sem hefðu einkennt stjórnendur US Steel of lengi.

Stéttarfélag stáliðnaðarmanna hafði hvatt stjórnvöld til að leggja mikla tolla á innflutt stál og ál, þegar Donald Trump lét til skarar skríða árið 2018.

Donald Trump sagðist margoft ætla stöðva söluna á US Steel til Nippon þegar hann kæmist til valda.

Höfuðstöðvar US Steel eru í Pennsylvaniu, sem var lykilríki í nýafstöðnum forsetakosningum í Bandaríkjunum. Donald Trump og JD Vance höfðu báðir farið mikinn í kosningabaráttunni um mikilvægi innlends eignarhalds á fyrirtækinu.

Rétt ákvörðun fyrir fólkið og þjóðaröryggi

Joe Biden tilkynnti um ákvörðun sína fyrr í dag við mikinn fögnuð stáliðnaðarmanna, sem sögðu ákvörðunina rétta fyrir verkafólk í geiranum og þjóðaröryggi í landinu.

„Sterkur stáliðnaður í innlendri eigu er gríðarlega mikilvægt þjóðaröryggismál, og er lykilatriði fyrir traustar aðfangakeðjur.

Stál knýr landið okkar áfram, innviði okkar, bílaiðnað okkar og varnariðnað okkar. Án innlendrar stálframleiðslu og innlendra stáliðnaðarmanna, er þjóð okkar veikari og óöruggari,“ sagði Biden.

Japönsk yfirvöld og eigendur beggja fyrirtækja hafa lýst yfir vonbrigðum og segjast ætla leita réttar síns.

„Við teljum að Biden hafi fórnað framtíð bandarískra stáliðnaðarmanna til að skora pólitísk stig,“ sögðu fyrirtækin tvö í sameiginlegri yfirlýsingu. Þá sendi ákvörðunin ísköld skilaboð til allra fyrirtækja sem höfðu hugsað sér að fjárfesta í Bandaríkjunum.

Þá taka japönsk yfirvöld málinu alvarlega.

„Það eru miklar áhyggjur í viðskiptalífinu hér og í Bandaríkjunum, sérstaklega í japönskum iðnaði, hvað framtíð viðskipta og fjárfestinga milli þessara tveggja landa varðar. Japönsk yfirvöld hafa engra annarra kosta völ en að taka þessu alvarlega,“ sagði japanski iðnaðarráðherrann Yoji Muto við fréttastofu Reuters.