Búið að laga bilunina

Fréttin hefur verið uppfærð eftir að skilríkin fóru að virka á ný.

Rafræn skilríki í farsíma virðast ekki virka eins og er en þegar innskráning er reynd á island.is, til dæmis fyrir Heilsuveru, fá notendur skilaboð um að þjónustan liggi niðri.

Á vef Auðkennis segir að vegna truflana á netþjónustu kunni að verða tafir á þjónustu Auðkennis. Verið sé að vinna að lagfæringum.

Þá hefur tilkynning borist frá Reiknistofu bankanna um að rekstrartruflanir séu í gangi og allt bendi til þess að þær „tengist rekstri innan RB“. Virkni netbanka er sögð takmörkuð og einnig virkni rafrænna skilríkja. 

Greiðslukort virki hins vegar í verslunum.

Málið hefur ekki verið tilkynnt til netöryggissveitarinnar CERT-IS, sem bendir til þess að ekki sé um netárás að ræða.