Öl­gerðin kaupir Gæðabakstur

Í tilkynningu Ölgerðarinnar til Kauphallar segir að Gæðabakstur sé 20 prósent eigu Vilhjálms Þorlákssonar, framkvæmdastjóra Gæðabaksturs, og 80 prósent í eigu Dragsbæk A/S í gegnum dótturfélagið Viska ehf. 

Heildarvirði viðskiptanna sé 3,454 milljarðar króna og að frádregnum vaxtaberandi skuldum sé áætlað kaupverð félagsins á afhendingardegi um 2,7 milljarðar króna. Kaupin séu gerð með fyrirvara um niðurstöðu áreiðanleikakönnunar, endanlega skjalagerð og samþykki Samkeppniseftirlitsins. 

Framkvæmdastjórinn heldur starfinu og gæti fengið vænan bónus

Gæðabakstur verði rekið sem sérstakt félag innan samstæðu Ölgerðarinnar og Vilhjálmur verði áfram framkvæmdastjóri. Náist rekstrarmarkmið á næstu tveimur árum eftir kaupin kunni kaupverð á hans hluta að hækka um allt að 100 milljónir króna.

Gæðabakstur hafi velt 3,357 milljörðum króna og skilað 468 milljónum króna EBITDA á síðasta ári og starfsfólk sé um 150 talsins. Starfsemi félagsins sé í eigin húsnæði að Lynghálsi 7, sem sé 5.057 fermetrar að stærð auk 3.000 fermetra byggingaréttar. Fyrirtækið hafi vaxið hratt frá stofnun 1993 og sé umfangsmikið í sölu til stórmarkaða, hótela og veitingastaða.

Veltan nálgast fimmtíu milljarða

„Við erum afar ánægð með þessi viðskipti, sem eru samkvæmt stefnu Ölgerðarinnar um vöxt félagsins og þau falla vel að kjarnastyrkleika Ölgerðarinnar í vörumerkjauppbyggingu, enda Gæðabakstur með fjölmörg afar vel þekkt vörumerki á innanlandsmarkaði. Þá er ekki síður mikilvægt að hafa tryggt að Vilhjálmur haldi áfram störfum hjá Gæðabakstri. Í þessari viðbót við samstæðu Ölgerðarinnar felast mikil tækifæri, til að mynda í sölu, dreifingu, innkaupum og vöruþróun. Þá munu vörur Gæðabaksturs njóta góðs af öflugri vöruhúsa- og dreifingarmiðstöð Ölgerðarinnar sem rísa mun á Hólmsheiði. Með þessari viðbót verður velta Ölgerðarinnar nálægt 50 milljörðum króna,“ er haft eftir Andra Þór Guðmundssyni, forstjóra Ölgerðarinnar.

Þá er haft haft eftir Vilhjálmi að mikið vatn hafi runnið til sjávar síðan Gæðabakstur tók til starfa við framleiðslu kleina og kleinuhringja í 69 fermetra húsnæði. Kaup Ölgerðarinnar séu staðfesting á góðu starfi sem unnið hafi verið hjá Gæðabakstri.

„Við höfum ávallt verið heppin með starfsfólk og auk þess fjárfest skynsamlega í fasteignum og framleiðslutækjum og búum nú vel að miklum mannauði og húsnæði að Lynghálsi með sterkan rekstrargrundvöll. Ég hlakka til að starfa innan samstæðu Ölgerðarinnar og horfi bjartsýnn til framtíðar.“

Ráðgjafar Ölgerðarinnar í viðskiptunum eru XAX Advisors, sérhæft ráðgjafafyrirtæki stofnað af þeim Leó Haukssyni og Klemens Arnarsyni, og lögmannsstofan LOGOS.