Á­kvörðun Einars eins og þruma úr heið­skíru lofti

„Ekkert í samstarfinu gaf tilefni til þessa, engar kröfur eða samtöl hafa farið fram innan meirihlutans um mikilvægi þess að breyta um kúrs fram að þessu. Ákvörðun Einars er vonbrigði enda var meirihlutasamstarfið farsælt og mörg mikilvæg verkefni í fullum gangi þar sem við vinnum af heilum hug fyrir hag borgarbúa. Óvissa um stefnu og rekstur Reykjavíkurborgar er hættuspil sem og kúvendingar í mikilvægum málaflokkum þegar svo langt er liðið á kjörtímabilið,“ segir Heiða Björg í tilkynningu á Facebook-síðu sinni fyrir stuttu.

Einar kallaði oddvita á fund í gærkvöldi og tilkynnti að hann ætlaði að slíta samstarfi. Fram kom í fréttum í gær að Framsóknarflokkur, Sjálfstæðisflokkur, Flokkur fólksin og Viðreisn hafi hafið meirihlutaviðræður. Ekki liggur fyrir hvar eða hvenær verður fundað í dag en formlegar viðræður eru hafnar. 

Heiða Björg segist ekki trúa því að meirihluti borgarfulltrúa muni blessa þessa „hönnuðu atburðarás sem nú er hafin og virðist hafa það helst að markmiði að koma Sjálfstæðisflokknum til valda á ný.“

Ákvörðunin áfall

Heiða Björg segir segir stjórnmál ganga út á traust og hún hafi ekki séð þetta fyrir.

„Mér var mjög brugðið og sá ekki aðdragandann að þessu eða þann málefnalega ágreining sem ætti að leiða til slíks,“ segir Heiða Björg í samtali við fréttastofu.

Hún segir það alltaf þannig í meirihlutasamstarfi að það séu ekki alltaf allir sammála en engin stór ágreiningsmál séu uppi. Flugvallarmálið hafi alls ekki verið eitt þeirra og auk þess sé það mál sem ræðst ekki bara í borgarstjórn. 

Spurð hvort henni þyki þessi ákvörðun Einars óheiðarleg segir Heiða Björg ákvörðunina hafa komið sér á óvart.

„Já, ég sagði það hreint út við hann í gær. Ég hef átt gott samstarf við Einar og treysti honum fullkomlega en þegar maður er saman í meirihluta byggir það á sáttmála og trausti og það ber stóran skugga á það samstarf að hann sé kominn í viðræður við aðra flokka án þess að láta okkur vita,“ segir Heiða.

Öllum í meirihlutanum hafi verið brugðið. Hann hafi tekið þessa ákvörðun og verði að standa við hana. Það sé svo verkefni borgarbúa að dæma þá ákvörðun.

„Hann virðist hafa það sérstaklega í huga að vera áfram borgarstjóri og finnst hann ekki hafa komið miklu í verk. Þannig hann hlýtur að vera að horfa til þess að breyta um takt og vill ekki ræða um það við okkur. Þá er það niðurstaðan,“ segir Heiða Björg.

Til í að tala við alla

Hún viti ekki hversu langt hann hafi verið kominn í viðræðum við aðra.

Hún segir Samfylkinguna áfram vinna að málefnum borgarbúa. Þau séu til í að tala við alla og vilji halda áfram að vinna í þágu borgarbúa.

„Mér finnst þetta líka erfiður tímapunktur. Það er mikið í gangi í samfélaginu. Órói og einhver persónulegur metnaður á þessum tíma er kannski ekki borginni til framdráttar.“

Borgarfulltrúar eru 23 talsins og þarf því 12 til að mynda nýjan meirihluta.

Skipting borgarfulltrúa milli flokka er eftirfarandi:

• Sjálfstæðisflokkurinn: 6
• Samfylkingin: 5
• Framsóknarflokkurinn: 4
• Píratar: 3
• Sósíalistaflokkur Íslands: 2
• Viðreisn: 1
• Vinstrihreyfingin grænt framboð: 1
• Flokkur fólksins: 1

Heiða Björg segir það hlutverk þeirra sem kjörin eru sem borgarfulltrúar að mynda meirihluta. Það séu aðrir valmöguleikar í boði en sá sem Einar hafi stillt upp. Hún segist hafa mikla trú á borgarfulltrúum og það séu allir að skoða hvernig þeir geti tryggt „farsæla og góða stjórn“ í borginni.

„Það er það sem skiptir mestu máli og það sem borgarbúar eiga skilið. Það er ekki einhver glundroði og einhverjir eiginhagsmunaseggir eða að maður sé að horfa sérstaklega hvað maður fær sjálfur. Heldur að tryggja góðan rekstur, góða þjónustu og sterkan og góðan ramma utan um stjórn borgarinnar. Þar erum við alltaf.“

Einar hafi forskot en hún ræði líka við alla oddvita

Heiða Björg segir að eftir fund með Einari hafi hún rætt við oddvita allra annarra flokka. Einar hafi verið í þessum viðræðum í einhverja daga og hann hafi því eitthvað forskot.

Hvað varðar Viðreisn segist Heiða Björg skilja að þau reyni að taka þátt í að mynda nýjan meirihluta, það sé þeirra hlutverk. Hún hafi samt ekki endilega trú á því að þeim takist það. Það sé ekki endilega málefnalegur grundvöllur heldur sé líklegra að samstaða finnist á miðjunni.

Hvort Samfylkingin og Framsóknarflokkurinn nái aftur saman segist Heiða ekki útiloka neitt en Einar hafi gefið skýrt til kynna að hann langi ekki að vinna með þeim. Hann yrði að skipta um skoðun. Hann hafi einhverjar ástæður og verði að svara fyrir það sjálfur.

Hún segist ekki geta sagt til um það hvort fjarvera Dags B. Eggertssonar sé ástæða meirihlutaslitanna eða hvort það hafi haft áhrif. Dagur sé nýfarinn og þau rétt svo að byrja að vinna saman.

Heiða telur Einar ekki hafa nýtt meirihlutasamstarf fast í hendi. Hún viðurkennir að eftir alþingiskosningarnar í nóvember hafi verið mikill óróleiki meðal Framsóknarmanna og fylgið hafi dalað.

„Það eru öll möguleg samtöl í gangi hjá öllum. Ég held það séu allir flokkar að skoða stöðuna og hvað er hægt að gera út frá málefnalegum grunni. Hvað fólk vill gera fyrir borgina, hvernig stefna flokkanna liggur, hverjir eiga mesta samleið. Við héldum að við ættum mjög góða samleið með Framsókn en þeir telja ekki svo og þá verður maður bara að skoða aðra kosti.“ segir Heiða Björg.

Atburðarásin lykti af óheilindum

Skúli Helgason borgarfulltrúi Samfylkingar tekur í sama streng í færslu á Facebook.

„Ákvörðun Einars Þorsteinssonar oddvita Framsóknar um að slíta meirihlutanum í borginni kom mjög á óvart enda hefur samstarfið verið í öllum meginatriðum gott. Vissulega hafa verið mismunandi skoðanir innan hans um flugvallarmál en þau hafa skipt fólki í andstæðar fylkingar milli flokka og innan flokka alla þessa öld svo það átti ekki að koma neinum á óvart,“ segir Skúli.

Hann segir atburðarásina lykta af óheilindum.

„…og slíkt er aldrei vænlegur fylgifiskur í stjórnmálum. Við í Samfylkingunni munum áfram einbeita okkur að því sem skiptir mestu fyrir hag borgarbúa þar sem húsnæðisuppbygging, fjölbreyttar samgöngur, menntun, menning og velferð eru í forgangi,“ segir hann að lokum.