Segja á­herslur Trump-stjórnarinnar fela í sér tæki­færi fyrir Icelandair

Uppsveifla hagkerfis Bandaríkjanna undir stjórn Trump geti kynt undir vaxtaráform Icelandair. „Við munum keppa við þá stóru, en við höfum forskot sem mun alltaf vera til staðar,“ er haft eftir Boga Nils Bogasyni, forstjóra félagsins, í umfjöllun Telegraph. „Við erum á miðju Athlangshafi og getum flogið nettari flugvélum lengra inn í Norður-Ameríku en evrópskir keppinautar okkar og lengra inn í Evrópu en Ameríkanarnir,“ segir Bogi.

Vísað er til að mynda til risa á flugmarkaði á borð við British Airwaves og American Airlines sem eru keppinautar Icelandair í áætlunarflugi yfir Atlantshafið. Haft er eftir Boga að það að gera út smærri flugvélar frá Íslandi geri Icelandair kleift að undirbjóða risa á markaði á borð við fyrrnefnd flugfélög.

Áform eru um að fjölga áfangastöðum Icelandair í Norður-Ameríku en fyrirtækið greindi til að mynda frá því í lok janúar Miami á Flórída muni bætast við leiðakerfið. „Nýju Airbus vélarnar, sem eru bæði langdrægar og sparneytnar, gera okkur kleift að bæta við nýjum og spennandi áfangastöðum og er Miami gott dæmi um það. Flugleiðin opnar auk þess öflugar tengingar fyrir íbúa Miami til 34 áfangastaða okkar í Evrópu, um Ísland og sömuleiðis fyrir Evrópubúa til Miami,“ sagði Bogi Níls við það tilefni.

Icelandair geti hagnast á Grænlandsáhuga Trumps

Í frétt Telegraph víkur sögunni næst að þeim áhuga sem Donald Trump hefur sýnt Grænlandi og tekið fram að Ísland geti notið góðs af forsetatíð Trumps. Búist sé við að bandarískt hagkerfi haldi áfram að blómstra á næstu tveimur árum og Evrópa muni á sama tíma dragast aftur úr. Það ætti, samkvæmt umfjöllun Telegraph, að skapa traustan grunn undir stækkunaráform Icelandair.

Félagið geti til að mynda notið góðs af auknum áhuga bandarískra ferðamanna á Grænlandi sem áfangastað, sem skýrist af útþensluáhuga Trumps til Grænlands. Vísbendingar séu þegar um að málflutningur Trump hafi þegar ýtt undir áhuga Bandaríkjamanna á ferðalögum til Grænlands, og í þessu felist mikil tækifæri fyrir Icelandair. Sama eigi við um ferðamenn sem vilji heimsækja Ísland.

Fleiri gluggar opnist jafnframt fyrir félagið með komu nýrra Airbus-véla sem séu nógu langdrægar til að gera út til Kaliforníu og Texas en bjóði á sama tíma upp á rekstrarhagkvæmni smærri flugvéla. Hnattræn lega Íslands sé jafnframt hagkvæm fyrir ferðir milli Asíu og Norður-Ameríku og þannig sé tækifæri fyrir Ísland til að gegna hlutverki flugmóðurskips fyrir ferðir heimsálfa á milli, jafnvel að vera „Dubai norðursins,“ en flugvöllurinn í Dubai er ein stærsta miðstöð flugsamgangna þess heimshluta. Nánar er fjallað um málið í frétt Telegraph.