Setja fúlgur fjár í herinn: Segir á­standið verra en í kalda stríðinu

„Við erum í mun erfiðara og mun hættulegra öryggisástandi en við höfum verið áður á minni ævi. Þetta er verra en í kalda stríðinu,“ sagði Frederiksen í dag samkvæmt TV2.

Fregnir hafa borist af því að ríkisstjórn Danmerkur ætlar að setja milljarða danskra króna í sérstakan sjóð sem ætlaður er til hergagnakaupa og hernaðaruppbyggingar. Sjóður þessi á, samkvæmt TV2, að innihalda fimmtíu milljarða króna og stendur til að nota helminginn á þessu ári og restina á því næsta.

Samkvæmt heimildum DR stendur meðal annars til að nota peningana til að bæta loftvarnir Danmerkur til muna. DR segir að allt að hundrað milljónir danskra króna verði settir í sjóðinn. Ein dönsk króna samsvarar tæpum tuttugu íslenskum. Sama hvort reynist rétt er um að ræða hundruð milljarða íslenskra króna.

Til stendur að kynna ætlanir ríkisstjórnarinnar í þessum málum frekar á morgun.

Ráðamenn víða um Evrópu hafa áhyggjur af stöðu varnarmála þessa daga, þar sem Donald Trump, forseti Bandaríkjanna, og hans fólk hafa gert ljóst að þeir ætli að draga úr umsvifum Bandaríkjanna í Evrópu. Trump-liðar hafa gagnrýnt ríki Evrópu harðlega fyrir að verja litlu til varnarmála og hafa kallað eftir umfangsmikilli aukningu þar á.

Frederiksen sat í gær leiðtogafund í París, þar sem staðan var rædd í þaula. Eftir fundinn sagði hún mikilvægasta boðskap fundarins hafa verið að Evrópa þurfi að vígbúast.

Uppbygging nauðsynleg til að koma í veg fyrir stríð

Í ávarpi á þingi í vísaði Frederiksen til nýársræðu sinnar þar sem hún talaði um að Danir þyrftu að undirbúa sig fyrir sviðsmyndir sem fáir hefðu getað ímyndað sér fyrir nokkrum árum. Hún sagði í dag að hversu hratt þessar sviðsmyndir hefðu raungerst hefðu komið henni á óvart.

Ástandið væri erfitt fyrir ríkið, konungsríkið og heimsálfuna alla.

Hún sagði hernaðaruppbyggingu nauðsynlega til að koma í veg fyrir stríð.

Sjá einnig: Danir telja Rússa geta hafið stór­stríð í Evrópu á allra næstu árum

Vísaði hún til vendinga vaðandi mögulegar friðarviðræður í Úkraínu og að stíga þyrfti varlega til jarðar í þeim efnum. Vopnahlé án friðarsamkomulags gæti veitt Vladimír Pútín, forseta Rússlands, tækifæri til að byggja upp her sinn á nýju og gera í kjölfarið aðra innrás í Úkraínu eða ógna öðrum ríkjum.

Hún sagði vopnahlé án friðar líklega það sem Pútín ætlaði sér og þess vegna væri hún hlynnt inngöngu Úkraínu í NATO.

Frederiksen var spurð út í það hvaðan fjármunirnir ættu að koma og sagði hún mögulegt að næstu ár gætu orðið erfið. Breyta þurfi forgangsröðum þegar kemur að því að verja peningum ríkisins. Þá sagði hún að hún myndi vilja eiga þá umræðu milli stjórnmálaflokkanna í Danmörku.