Ert þú ung kona á leiðinni á landsfund?

Hópur ungra Sjálfstæðiskvenna skrifar 28. febrúar 2025 08:15

Sjálfstæðisflokkurinn stendur frammi fyrir mikilvægu vali sem móta mun framtíð sína næstu helgi. Til að tryggja öflugan og stóran Sjálfstæðisflokk, sem mætir þörfum allra kynslóða, þurfum við leiðtoga sem skilur ungar konur, virðir eldri kynslóðir og getur brúað bilið á milli þeirra. Sá leiðtogi er Guðrún Hafsteinsdóttir.

Guðrún er konan sem hefur rutt brautina sem við ungar sjálfstæðiskonur viljum fylgja. Hún hefur með elju og dugnaði byggt upp fyrirtæki og skapað störf. Hún hefur leitt fyrirtæki sitt með góðu fordæmi, á eigin forsendum, með styrk sem við dáumst að. Hún er alþýðleg, aðgengileg og sannarlega fyrirmynd fyrir okkur ungar sjálfstæðiskonur.

Hún sýnir að sannur leiðtogi mótar eigin vegferð og er ekki bundinn við fyrirframgefnar hugmyndir, heldur skiptir mestu að hafa sterka sýn, mannleg gildi og kjark til að framkvæma. Hún er hlý, traust og reiðubúin að vinna með öllum, óháð aldri, búsetu og bakgrunni. Hún veit að saman erum við sterkari og að framtíðin krefst samtals milli kynslóða. Hún brennur fyrir öflugu samfélagi, þar sem við öll eigum tilverurétt og tækifæri til að blómstra.

Framúrskarandi leiðtogi og fyrirmynd

Það sem gerir Guðrúnu Hafsteinsdóttur einstaka er hversu framúrskarandi hún er á öllum sviðum, bæði sem sjálfstæðiskona og sjálfstæð kona. Hún er brautryðjandi í sínu samfélagi og lætur ekkert stöðva sig þegar kemur að því að finna lausnir og skapa tækifæri.

Þegar börnin hennar gátu ekki æft sund í Hveragerði, tók hún því ekki sem svari, heldur brást við með því að stofna sunddeild, svo öll börn í bænum gætu lært að synda í sinni heimabyggð. Þessi drifkraftur og framkvæmdagleði einkennir hana á öllum sviðum.

Atvinnuferill Guðrúnar er ekki síður til eftirbreytni. Aðeins 23 ára gömul, tók hún við fjölskyldufyrirtækinu og leiddi það til þeirrar velgengni og virðingar sem Kjörís nýtur í dag. Vörumerkið hefur ratað inn á flest heimili landsins og er eitt af sterkustu innlendu vörumerkjum okkar tíma.

Guðrún þjónar sínu nærumhverfi af eljusemi og einurð – og allt þetta gerir hún með sjálfstæðisstefnuna að vopni. Hún er sönn fyrirmynd fyrir ungar sjálfstæðiskonur og lifandi sönnun þess að með dugnaði, áræðni og réttum gildum eru okkur allir vegir færir.

Við undirritaðar, ungar sjálfstæðiskonur, viljum leiðtoga sem hlustar, skilur og hefur sýnt í verki að hún stendur með okkur öllum. Við trúum á Guðrúnu Hafsteinsdóttur, við trúum því að hún muni hefja flokkinn okkar aftur til þeirrar vegs og virðingar sem hann á skilið í íslensku samfélagi. Nú er tíminn til að sameina krafta okkar og styðja leiðtoga sem getur leitt flokkinn til nýrra sigra.

Stækkum Sjálfstæðisflokkinn, stétt með stétt.

Höfundar eru ungar sjálfstæðiskonur á leiðinni á landsfund.