Þor­gerður lætur ekki nettröllin hræða sig

Þorgerður Katrín er óvænt orðin ein helsta stjarnan á X eftir að hún skrifaði, í kjölfar frægs fundar Donald Trump Bandaríkjaforseta og Volodymyrs Zelenskyy forseta Úkraínu það að Ísland stæði með Úkraínu.

„Þið eruð ekki ein. Af öllu hjarta styður Ísland Úkraínu í leit þeirra að friði og réttlæti gegn ólögmætri árás Rússa.“

Þorgerður Katrín er ekki blámerkt á X, en þannig merkir Elon Musk eigandi miðilsins þá sem hafa keypt sér sérstaka dreifingu á samfélagsmiðlinum. Síðast var Þorgerður Katrín með 17 læk en nú bregður svo við að hún er 63 þúsund læk, tæplega fjögur þúsund svör og 6.700 manns hafa dreift færslunni.

Rússneski herinn búinn – íslenski herinn er á leiðinni

Og ekki eru svörin jákvæð heldur fyrst og síðast háðsk. „Oh, no,“ segir Michael Brasher. „Örlög rússneska hersins eru ráðin. Íslenski herinn er á leið til bjargar.“ Og þannig gengur dælan og er reyndar ótrúlegt að lesa sumar athugasemdirnar.

Fréttamaður fréttastofu spurði Þorgerði Katrínu út í málið að loknum ríkisstjórnarfundi í morgun, út í þessi neikvæðu viðbrögð. Er þetta til marks um að erfitt geti reynst fyrir Ísland að vera með svona yfirlýsingar?

„Nei, síður en svo. Ég held að það skipti miklu máli að Ísland standi við og standi með þeim gildum sem við höfum staðið með í gegnum tíðina.“

Verið að reyna að hræða úr okkur líftóruna

Þorgerður Katrín sagði sem dæmi að Ísland hefði ekki gefið út yfirlýsingar á borð við viðurkenningu á sjálfstæði Eistrasaltsríkjanna og Krótatíu, en við vorum fyrsta ríkið til að viðurkenna sjálfstæði þeirra, ef samfélagsmiðlar hefðu ráðið för.

„Það er verið að reyna að hræða úr okkur líftóruna. Nei, það sem við höfum, eitt af því er röddin okkar.“

Þorgerður Katrín lýsti því jafnframt yfir að henni hafi þótt vænt um að Ísland væri í þeim hópi ríkja sem Úkraína dró sérstaklega fram þegar nefnt var að yfirlýsingin hefði skipt miklu máli.

„Við vitum það að það eru nettröll og ég hef verið vöruð við því á fundum með hinum og þessum á síðustu vikum, að við megum búast við því að fókusinn fari meira á okkur þegar við erum að taka svona eindregna afstöðu með Úkraínu. Líka í öðrum alþjóðlegum málum sem lönd hafa skoðanir á en við erum ekkert að láta nein nettröll hrekja okkur af leið. Fyrst og síðast stöndum við með lýðræðinu, mannréttindum og friði.“