Metsætanýting í febrúar hjá Icelandair

Þar segir að tekjur á hvern seldan sætiskílómetra (e. yield) hafi numið 8,0 bandarískum sentum og hafi lækkað samanborið við febrúar á síðasta ári en betri sætanýting vó hins vegar upp á móti þessari lækkun, sem skilaði sér í svipuðum farþegaeiningatekjum og í fyrra.

Þá segir einnig að seldir blokktímar í leiguflugi hafi verið 27% fleiri en í febrúar í fyrra en fraktflutningar hafi dregist saman um 10%. Þá dróst kolefnislosun á hvern tonnkílómetra saman um 6% samanborið við febrúar í fyrra vegna betri sætanýtingar og fleiri ferða á hagkvæmari B737 MAX og A321 LR vélum.

Bogi Nils Bogason, forstjóri Icelandair, segir í tilkynningu að það sé ánægjulegt að geta enn og aftur greint frá jákvæðri þróun í farþegatölum þeirra, sem endurspegli mikið traust viðskiptavina til Icelandair og virði þeirra þjónustu. Hann segir að sætanýting í febrúar hafi verið met, á sama tíma og framboð jókst um 8% milli ára. 

Bogi heldur áfram. „Þá hófum við farmiðasölu með nýjasta samstarfsfélagi okkar, Southwest Airlines. Samstarfið opnar nýja og betri tengimöguleika fyrir farþega við fjölda markaða í Norður-Ameríku, fyrst um sinn í gegnum Baltimore flugvöll. Nú þegar höfum við fengið bókanir frá 43 flugvöllum í Bandaríkjunum.“ 

„Við hlökkum til sumarvertíðarinnar og er undirbúningur nú þegar í fullum gangi. Við tókum á móti annarri Airbus flugvél í lok síðustu viku og gerum við ráð fyrir því að taka á móti tveimur vélum til viðbótar á næstu mánuðum,“ segir forstjórinn kátur með sætanýtinguna.