„Ábyrgðaleysi að lofa ein­hverju sem ekki er hægt að fram­kvæma sam­kvæmt lögum“

Í upphafi árs kviknaði í nokkrum hjólhýsum uppi á Sævarhöfða. Krafan um betri stað varð enn háværari eftir brunann. Dóra Björt Guðjónsdóttir er formaður umhverfis- og skipulagsráðs Reykjavíkurborgar.

„Aðstæður þar hafa verið óviðunandi og það hefur verið gagnrýnt mikið. Í fyrri meirihluta var ekki vilji til þess að leysa það mál og ég var í svolitlum vanda sem formaður umhverfis-og skipulagsráðs af því mér var í rauninni ekki heimilt að finna nýtt svæði fyrir þennan hóp sem býr þarna og við erum öll sammála um að þetta sé ekki í lagi.“

Sandra Hlíf Ocares, varaborgarfulltrúi Sjálfstæðisflokksins setur spurningamerki við að Reykjavíkurborg ætli sér að skipuleggja hjólhýsabyggð í ljósi þess að regluverk fyrir slíka búsetu sé ekki fyrir hendi. Það sé til dæmis ekki hægt að skrá lögheimili í hjólhýsi.

„Ef þær ætluðu að heimila þetta þá þyrfti regluverkið að endurspegla það, sem það gerir ekki. Það er engin fráveita, ekkert regluverk um eldvarnir og annað og ég spyr mig líka er þetta viðunandi húsnæði við börn? Ég set spurningamerki við það. Þetta er ekki skilgreint inn í deiliskipulagi. Það er bara svo margt sem þarf að gera. Ég tel að það sé algjörlega útilokað að það verði eitthvað drastískt gert á 15 mánuðum og mér finnst þetta vera lagt fram í ábyrgðaleysi þar sem það er ákveðinn ómöguleiki til staðar. Mér finnst þetta ábyrgðaleysi að lofa einverju sem ekki er hægt að framkvæma samkvæmt lögum,“ segir Sandra.

Þrátt fyrir að hún styðji frelsi fólks til að velja búsetuform þá verði lagarammi að vera til staðar. Íslendingar séu heppnir með það hversu miklar gæðakröfur séu gerðar til íbúahúsnæðis.

„Við heimilum ekki einu sinni að fólk sé með skráð lögheimili í atvinnuhúsnæði sem er þó betur byggt og betur búið að öllum gæða og öryggis stöðlum heldur en hjólhýsi. Þannig að þau eru svolítið að byrja á vitlausum enda en þeim er í lófa lagt að gera eitthvað i því þar sem þessi meirihluti situr líka inni á þingi þannig að þau ættu að byrja þar.“

Gagnrýni minnihlutans var borin undir Dóru Björt.

„Staðan er sannarlega þannig í dag að þarna eru einstaklingar sem neyðast til að búa þarna og hafa ekki í önnur hús að venda. Þarna eru líka einstaklingar sem velja þetta sem sinn lífsstíl en á meðan staðan er þannig þá verðum við að vera raunsæ og horfast í augu við þessar aðstæður, þá er ekki hægt að loka augunum, vera aðeins of fín fyrir það að ætla að leysa þetta því okkur hentar ekki að gera það eða þetta er ekki lífsstíll sem okkur finnst ásættanlegur. Okkar finnst það ekki vera í lagi að gera það. Við viljum finna þessu nýjan og ásættanlegan stað og svo ræða næstu skref til frambúðar í samráði við þennan hóp. Hann á það skilið að við tökum þeirra aðstæður alvarlega og leysum þessi mál með þeim,“ segir Dóra Björt.