Real Madríd jafnaði topp­lið Barcelona að stigum

Leik Barcelona og Osasuna var frestað um óákveðinn tíma eftir að liðslæknir liðsins lést óvænt í gær, laugardag.

Þar sem Barcelona hafði því ekki leikið í 28. umferð La Liga gat Real jafnað toppliðið og erkifjendur sína að stigum með sigri í dag.

Það tókst þökk sé mörkum stórstjarnanna Kylian Mbappé og Vinícius Júnior með fjögurra mínútna millibili í fyrri hálfleik. Gestirnir minnkuðu muninn fyrir lok fyrri hálfleiks en þar sem ekkert var skorað í síðari hálfleik vann Real 2-1 sigur.

Real Madríd varð hins vegar fyrir áfalli undir lok leiks þegar Jude Bellingham fór af velli eftir að verða fyrir hnjaski. Ekki er vitað hvort um alvarleg meiðsli sé að ræða að svo stöddu.

Fyrr í dag hafði Atlético Madríd tapað nokkuð óvænt 2-1 fyrir Getafe. Það þýðir að Atlético er áfram með 56 stig á meðan toppliðin tvö eru með stigi meira. Barcelona á svo leik til góða en enn er óvíst hvenær leikur Börsunga gegn Osasuna fer fram.