Þrjár kempur spila með KV í sumar

Þeir Theodór Elmar Bjarnason, Pálmi Rafn Pálmason og Aron Bjarki Jósepsson voru kynntir sem leikmenn KV á samfélagsmiðlum liðsins í dag. Allir þrír eru fyrrum leikmenn KR og meðalaldur þeirra tæp 40 ár.

Theodór Elmar er aðstoðarþjálfari karlaliðs KR-inga en hann hætti knattspyrnuiðkun í haust eftir að síðustu leiktíð lauk. Hann mun hins vegar spila með KV, líkt og Pálmi Rafn, sem spilaði síðast í 2. deild með Völsungi sumarið 2023.

Aron Bjarki spilaði með Gróttu í Lengjudeildinni síðasta sumar. Allir þrír hafa fengið félagsskipti til KV og hafa spilað með KV í Lengjubikarnum í vetur.

Þremenningarnir voru kynntir til leiks í veglegu myndbandi sem sjá má að neðan. KV mætir Fylki í Mjólkurbikarnum í Vesturbænum á morgun og má gera ráð fyrir að þeir þrír komi við sögu.

Samkvæmt heimildum Vísis mun Óskar Örn Hauksson vera á leiðinni í Vesturbæinn og gæti bæst við hópinn.