Við­ræður hafnar um fram­hald á Adolescence

Þættirnir Adolescence voru frumsýndir á Netflix um miðjan síðasta mánuð og urðu samstundis vinsælustu þættir veitunnar. Mikið umtal skapaðist í kringum þættina, sérstaklega um snjallsímanotkun barna og þann dulda heim sem birtist á samfélagsmiðlum barna sem foreldrar hafa jafnvel enga hugmynd um.

Forstjórar Plan B, Dede Gardner og Jeremy Kleiner, sögðu við miðilinn Deadline að þau væru byrjuð að ræða við leikstjórann Philip Barantini um „næstu útgáfu“ þáttanna.

Þar sagði Gardner að þau væru að hugsa hvernig hægt væri að „víkka ljósopið, halda tryggð við erfðaefni þeirra og ekki vera endurtekningarsöm.“ Hún vildi þó ekkert gefa frekar upp um áætlanir framleiðslufyrirtæksins, hvorki hvort þættirnir yrðu beint framhald fyrstu þáttaraðarinnar eða myndu vera sjálfstætt framhald.

Kleiner sagðist vona að Jack Thorne, handritshöfundur fyrstu þáttaraðarinnar, og Stephen Graham, meðhöfundur þeirra og einn aðalleikaranna, myndu vera með í framhaldinu.

Gagnrýnandi Vísi fjallaði um Adolescence fyrir skömmu og gaf þáttunum fullt hús.

Landlæknir lagðist gegn sýningu í skólum

Nýlega var ákveðið í Bretlandi að Adolescence yrðu sýndur í grunnskólum til að efla forvarnir og auka meðvitund. 

Hérlendis lagðist Landlæknir gegn þeirri hugmynd þar sem það teldist ekki gagnleg forvörn. Nálgunin hefði ekki verið gagnreynd, kennarar væru ekki í stakk búnir til að takast á við viðbrögð sem gætu vaknað og það að útsetja börn fyrir sjokkerandi myndefni samræmdist ekki áfallamiðaðri nálgun í skólastarfi.

Ótti, skömm og sjokk myndu heldur ekki breyta hegðun fólks. Rannsóknir hefðu endurtekið sýnt að slíkar aðferðir væru ekki gagnlegar og gætu valdið skaða.