Kali­fornía fjórða öflugasta efnahagsríki heims

Verg landsframleiðsla í Kalíforníu nemur nú rúmum fjórum trilljónum Bandaríkjadala á ári hverju og nú eru aðeins Þýskaland, Kína og Bandaríkin í heild sinni stærri efnahagseiningar en Kalífornía. Gavin Newsom ríkisstjóri vakti athygli á þessari staðreynd og segir að Kalífornía haldi ekki einungis í við restina af heiminum, heldur stjórni hún ferðinni. 

Þessar tölur koma á sama tíma og Newsom hefur gagnrýnt tollastefnu Donalds Trump harðlega sem hann segir vinna gegn hagsmunum Bandaríkjanna og sé skaðleg til lengri tíma. Newsom hefur nú höfðað mál gegn Trump til að fá úr því skorið hvort hann geti sett slíkar álögur á einhliða. 

Það sem gerir Kalíforníu svo öfluga er að hún er afar öflugt framleiðsluríki, bæði á sviði iðnaðar og landbúnaðar. Að auki er tækniiðnaður heimsins að miklu leyti staðsettur þar og skemmtanaiðnaðurinn einnig. Til viðbótar eru tvær stærstu hafnir Bandaríkjanna í ríkinu.