Hefur á­hyggjur af öryggi skóla­barna í Laugar­dal

Borgarráð samþykkti tillögu umhverfis- og skipulagsráðs á fundi sínum í gær og fer málið nú til endanlegrar afgreiðslu borgarstjórnar. Borgarfulltrúar meirihlutaflokkanna og Framsóknar samþykktu tillöguna, en tveir borgarfulltrúar Sjálfstæðismanna greiddu atkvæði gegn.

Tillagan snýr að uppbyggingu skólaþorpsins sem ráðast á í vegna ýmissa framkvæmda á skólum í Laugardal – fyrst Laugarnesskóla og síðar Laugalækjarskóla og Langholtsskóla.

Lóðin hafði áður verið skilgreind sem lóð fyrir svokallaða Ævintýraborg, tímabundið leikskólaúrræði Reykjavíkurborgar, en verður nú breytt í lóð fyrir skólaþorp, tímabundið grunnskólaúrræði Reykjavíkurborgar. Þar að auki er lóðin stækkuð út fyrir mörk núverandi bílastæða og yfir aðliggjandi stíg, byggingarheimildir auknar og umferðarfyrirkomulagi breytt á bílastæðum milli Reykjavegar og Laugardalsvallar ásamt því að syðri innkeyrslu á stæðin frá Reykjavegi verður lokað.

Fram kemur að um tímabundna lausn sé að ræða þó að óljóst sé hversu lengi skólinn verður starfandi. Í skýrslum kemur þó fram að reiknað sé að það verði starfrækt í „allmörg ár“, eða fimm til fimmtán ár. Fyrirhugað er að reisa 2.200 fermetra skóla á bílastæðinu sem á að geta sinnt allt að 450 grunnskólakrökkum, frá 1. til 10. bekk.

Hefur áhyggjur af öryggi skólabarna

Hildur Björnsdóttir, borgarfulltrúi Sjálfstæðisflokksins, segir að ástæða þess að fulltrúar Sjálfstæðismanna í borgarráði hafi greitt atkvæði gegn tillögunni sé að þeir séu verulega ósáttir við þróun skólamála í Laugardal.

„Fjölskyldur og starfsfólk hefur verið skilið eftir í lausu lofti um lengri tíma og íbúasamráð var auðvitað haft að engu. Það getur með engu móti talist ásættanlegt að börnin í Laugardal þurfi nú að sinna sinni lögbundnu grunnskólagöngu á bílastæði í hverfinu næstu fimmtán árin. Við töldum því rétt að hafna tillögunni enda vel hægt að leysa málið með farsælli hætti,“ segir Hildur.

Hún segir að vel hefði mátt fyrirbyggja þessa stöðu ef eðlilegu viðhaldi á skólahúsnæði hefði verið sinnt síðasta áratuginn.

„En við þessar aðstæður hefði verið mikið eðlilegra að finna þessari bráðabirgðaaðstöðu fyrir skólastarfið betri stað en á miðju bílastæði sem umlukið er þónokkurri umferð. Það er full ástæða til að hafa miklar áhyggjur af öryggi skólabarna sem munu þurfa að sækja nám á þessum stað. Fólk getur hugsanlega horft í gegnum fingur sér með bráðabirgðaðastöðu af þessu tagi ef hún er tímabundin í nokkra mánuði, en að bjóða uppá þetta í mögulega fimmtán ár er bara óásættanlegt,“ segir Hildur.

Á síðu Reykjavíkurborgar um framkvæmdirnar segir að skólaþorpið muni rísa í áföngum og áætlað sé að fyrstu kennslustofurnar verði tilbúnar til notkunar haustið 2025. Þorpið muni svo rísa í heild veturinn 2025-2026.

Mikilvægt að börnin þurfi ekki að fara úr Dalnum

Einar Þorsteinsson, borgarfulltrúi Framsóknar og fyrrverandi borgarstjóri, segir að Framsókn styðji gerð skólaþorps í Laugardal. Gríðarlega mikilvægt sé að tryggja hagsmuni barna í skólum í Laugardal sem allir þurfi á miklu viðhaldi að halda.

„Nákvæm rannsókn á ástandi skólabygginga í dalnum sýnir að þar þarf að ráðast í umfangsmiklar framkvæmdir til þess að laga myglu og raka. Framkvæmdaaðilar telja langfarsælast að ráðast í framkvæmdir með sem fæstum börnum í skólunum. Þess vegna er bygging skólaþorps lykilatriði svo börn fái tryggðar góðar aðstæður á meðan framkvæmdum stendur. 

Laugarnesskóli er fyrstur en í kjölfarið þarf að ráðast í endurbætur á Laugalækjarskóla og Langholtsskóla. Mikilvægt er að börnin í Laugardal þurfi ekki að fara úr hverfinu á meðan framkvæmdum stendur,“ segir í bókun Einars.

Breiðari og upplýstir stígar og upphækkanir á þverunum  

Í samgöngumati um framkvæmdirnar, sem unnin var fyrir borgina af VSB Verkfræðistofu, er meðal annars fjallað um hvað þurfi að gera til að tryggja umferðaröryggi á svæðinu.

Segir meðal annars að tryggja þurfi að leið að sleppistæðum sé vel merkt þannig að komið sé í veg fyrir að foreldrar keyri inn í botnlangann að bílastæðum KSÍ fyrir hreyfihamlaða og hleypi börnunum út úr bílum þar.

Sömuleiðis sé þörf á því að breikka stíginn sem fari inn á skólalóð frá sleppistæðum ásamt því að fjölga göngu- og hjólastígum að skólalóð þar sem búast megi við talsverðri umferð af bæði hjólandi og gangandi vegfarendum. Huga þurfi vel að aðkomu vöruafhendingar og sorphirðu og tryggja öruggar og greiðar gönguleiðir skólabarna frá heimili til skóla til að ýta undir sjálfstæði þeirra.

Einnig segir að huga þurfi að lýsingu, merktum gangbrautum og upphækkun á völdum þverunum yfir götur, sérstaklega þverun yfir Reykjaveg við Hofteig og þverun yfir Gullteig við Hofteig.

Þá væri æskilegt sé að breikka stíga í grennd við þorpið til að þeir henti betur fyrir blandaða umferð, sérstaklega stíga meðfram Hofteigi, Laugardalsvelli og Laugardalslaug.