Jamil og Margrét á­fram: Bæði með mikinn metnað og mikið keppnis­skap

Nýi samningurinn er til tveggja ára eða til sumarsins 2027. Jamil er aðalþjálfari en Margrét aðstoðar hann.

Valskonur komust í undanúrslitin í Bónus deildinni í vetur á fyrsta tímabili þeirra Jamils og Margrétar með liðið.

„Það er magnað að hugsa til þess að ég sé að fara inn í mitt fjórða ár hér hjá félaginu. Þetta er orðið heimili mitt og ég er þakklátur fyrir að fá að starfa í frábæru umhverfi með frábæru fólki. Ég hlakka mikið til komandi tímabils þar sem við ætlum að halda áfram að byggja ofan á það sem við náðum síðasta tímabil. Við erum með frábæran hóp og við erum á réttri leið,“ sagði Jamil Abiad í viðtali við miðla Valsmanna.

Margrét er uppalinn Valsari en hún hefur verið að þjálfa yngri flokka hjá félaginu undanfarin ár. Hún er einnig í þjálfarateymi hjá yngri landsliðum frá árinu 2019. Í sumar er hún aðstoðarþjálfari átján ára landsliðs kvenna.

„Ég er mjög spennt fyrir næsta tímabili og samstarf okkar Jamil gekk mjög vel. Við erum bæði með mikinn metnað og mikið keppnisskap,“ sagði Margrét.

„Við getum verið stolt af þeim árangri sem við höfum náð en við viljum fara alla leið með liðið. Valur er ein stór fjölskylda í öllum boltagreinum og það eru forréttindi að fá að starfa hjá svona flottum klúbb sem Valur er. Það er líka spennandi fyrir mig að halda áfram að þjálfa elstu yngri flokka félagsins, við eigum marga góða árganga sem eru að koma upp og framtíðin er heldur betur björt á Hlíðarenda,“ sagði Margrét.