Úsbek­istan á HM í fót­bolta í fyrsta sinn

Úsbekunum nægði að gera markalaust jafnteflið við Sameinuðu arabísku furstadæmin. Þetta er í fyrsta sinn sem Úsbekar verða með í úrslitakeppni HM í fótbolta.

Markvörðurinn Utkir Yusupov var hetja Úsbeka en hann varði þrisvar mjög vel í seinni hálfleiknum en spilað var í Abú Dabí.

Úsbekistan er með fjögurra stiga forskot á Sameinuðu arabísku furstadæmin fyrir lokaumferðina í A-riðlinum. Furstadæmin fara ásamt Katar í umspil um sæti á HM.

Úsbekistan er þriðja Asíuþjóðin til að tryggja sig inn á HM en Japanir og Íranir höfðu áður gulltryggt sæti sitt. Suður-Kórea og Jórdanía komust einnig á HM í kvöld.

Suður Kórea og Jórdanía eru örugg með tvö efstu sætin í B-riðli en Írak og Óman þurfa að fara í umspilið. Kóreumenn unnu 2-0 útisigur á Írak en Jórdanía fagnaði 3-0 útisigri í Óman.

Japan er öruggt með toppsætið í C-riðli en Ástralar og Sádi-Arabar berjast um hitt sætið í lokaumferðinni.

Tíu þjóðir eru nú komnar inn á HM þar á meðal eru gestgjafarnir þrír, Bandaríkin, Mexíkó og Kanada. Hinar eru Japan, Nýja-Sjáland, Íran, Argentína, Úsbekistan, Suður-Kórea og Jórdanía.