Sigurður Fannar játar að hafa banað dóttur sinni

Ríkisútvarpið greinir frá, en í fréttinni segir að þrátt fyrir að játa sök hafi hann borið fyrir sig minnisleysi að einhverju leyti. 

Þá hafi hann samþykkt bótakröfu móður stúlkunnar upp á fimm miljónir króna í miskabætur og hálfa milljón í útfararkostnað. 

Samkvæmt heimildum fréttastofu fór verjandi Sigurðar Fannars fram á að þinghald í málinu yrði lokað. Móðir hinnar látnu mótmælti ekki þeirri kröfu ekki frekar en saksóknari í málinu. Héraðsdómur Reykjaness sagði í skriflegu svari í maí að þinghald yrði lokað til að hlífa fjölskyldu hinnar látnu.

Samkvæmt dagskrá Héraðsdóms Reykjaness lauk aðalmeðferð í dag og því má búast við dómi í málinu eftir fjórar vikur.