Yfir­taka Trumps á þjóð­varð­liðinu dæmd ó­lög­leg en hann heldur stjórninni

Dómarinn sakar Trump um að setja hættulegt fordæmi í notkun hermanna á bandarískri grundu.

Úrskurðurinn, sem lesa má hér, átti að taka gildi á hádegi í Kaliforníu í dag, en lögmenn dómsmálaráðuneytisins lýstu því strax yfir að málinu yrði áfrýjað. Alríkisdómarar sem munu taka þá áfrýjun fyrir samþykktu fljótt að fresta gildistöku úrskurðarins.

Áfrýjunin verður þó ekki tekin fyrir fyrr en á þriðjudaginn, samkvæmt frétt AP fréttaveitunnar. Því mun Trump hafa áfram stjórn á þeim fjögur þúsudnd meðlimum þjóðvarðliðsins sem hann hefur sent til Los Angeles, í það minnsta þar til á þriðjudaginn.

Trump heldur því fram að Los Angeles stæði í ljósum logum ef hann hefði ekki sent þjóðvarðliðið til borgarinnar.

Úrskurður dómarans tók ekki tillit til bandarískra landgönguliða sem Trump hefur sagt að verði sendir til Los Angeles.

Newsom höfðaði málið gegn Trump og bað dómarann um að stöðva það að hermennirnir tækju þátt í því að handsama fólk sem dvelur ólöglega í Bandaríkjunum í borginni.

Trump lýsti því yfir fyrr í vikunni að hann ætlaði að senda tvö þúsund menn úr þjóðvarðliði Kaliforníu til Los Angeles til að kveða niður mótmæli gegn áhlaupum og handtökum útsendara Innflytjendastofnunar Bandaríkjanna (ICE).

Þá tók hann yfir stjórn þjóðvarðliðsins en Newsom, Karen Bass borgarstjóri LA og yfirmenn lögreglunnar þar sögðu enga þörf á að senda þjóðvarðliða á vettvang. Trump fjölgaði þeim svo um tvö þúsund til viðbótar og ætlar einnig að senda sjö hundruð landgönguliða.

Trump og hans fólk hafa talað um mótmælin sem mjög umfangsmikil og stórhættulegar óeirðir sem ógni jafnvel tilvist borgarinnar. Ástandinu hefur einnig verið lýst sem innrás af Trump-liðum.

Kristi Noem, heimavarnaráðherra Bandaríkjanna, sagði á blaðamannafundi í gær, þar sem sitjandi öldungadeildarþingmaður frá Kaliforníu var handtekinn, að heimavaráðuneytið myndi auka viðveru í Los Angeles þar til borgin yrði „frelsuð“.

Embættismenn í Los Angeles og yfirmenn lögreglunnar segja ástandið langt frá því að vera eins slæmt og Trump og hans fólk hafi talað um. Um tiltölulega lítil mótmæli hafi verið að ræða og að löggæslustofnanir borgarinnar hafi verið vel í stakk búnar til að takast á við þau og refsa þeim sem brutu af sér, til dæmis með því að kveikja í bílum og veitast að löggæslumönnum.

Talsmenn Trumps segja úrskurðinn hættulegan en dómstólar hafa ítrekað staðið í vegi Trumps varðandi viðleitni hans til að vísa fjölda fólks úr landi, tolla og ýmislegt annað.

Anna Kelly, einn talsmanna Trumps, sendi út yfirlýsingu um að dómarar hefðu ekki heimildir til að svipta Trump valdi hans og að áfrýjun ríkisstjórnarinnar myndi bera árangur.