Sá sem réðst á Ingunni áfrýjar til hæstaréttar

Árni Sæberg skrifar 30. júní 2025 13:32

Ingunn Björnsdóttir varð fyrir fólskulegri árás á skrifstofu sinni í Óslóarháskóla. Vísir/Steingrímur Dúi

Norski nemandinn sem stakk Ingunni Björnsdóttur, dósent við Óslóarháskóla, nítján sinnum í fólskulegri árás á skrifstofu hennar hefur ákveðið að áfrýja dómi 7,5 ára fangelsisdómi sem hann hefur hlotið fyrir árásina. Hann áfrýjar dóminum aðallega hvað varðar réttarúrræði sem að óbreyttu mun heimila yfirvöldum að halda honum á bak við lás og slá eftir að hann afplánar dóminn.

Nemandinn var upphaflega dæmdur í 7,5 ára fangelsi í september í fyrra og hlaut einnig svokallaðan „forvaringsdom“ eða „öryggisvistun“ sem er sérstök tegund refsivistar þar sem dómþoli er settur í fangelsi án fyrirframákveðins lokadags. Tilgreindur árafjöldi gildir einungis svari viðkomandi meðferð og iðrist. Þeir sem hljóta slíkan dóm eru ekki látnir lausir nema að undangengnu mati á hættunni sem stafar af þeim og geta því setið í lífstíðarfangelsi.

Hann áfrýjaði þeim dómi og aðalmeðferð fór fram í lögmannsréttinum í Borgarþingi í Ósló í lok maí.

Fyrir lögmannsréttinum sagði stúdentinn, sem ekki hefur verið nafngreindur, að stunguárásin hafi verið „eina undankomuleiðin.“ Hann hafði lengi haft óbeit á Ingunni. Kennslan og viðmót hennar eftir að hann hafði skrópað í próf og endurtökupróf í fagi sem Ingunn kenndi fóru fyrir brjóstið á honum.

„Ég var hræddur um að Ingunn yrði þarna í margar annir í viðbót. Það fór ekki gott orð af henni, líka meðal samnemenda sem ég spjallaði við, og mér fannst ég ekki geta leyft þessu að halda áfram,“ sagði hann.

Í byrjun júní var dómur lægra dómstigs staðfestur. Norski miðillinn Khrono hefur eftir Petar Sekulic, verjanda nemandans, að nemandinn hefði ákveðið að áfrýja dómi lögmannsréttarins til Hæstaréttar Noregs. Það er að segja þeim hluta dómsins sem snýr að öryggisvistuninni.

Sama fyrirkomulag er í Noregi og hér á landi hvað áfrýjanir til hæstaréttar varðar. Því er ekki öruggt að nemandinn fái áheyrn réttarins, sem tekur ákvörðun um það hvort áfrýjunarleyfi verði veitt.

Noregur Íslendingar erlendis Erlend sakamál Hnífstunguárás við Oslóarháskóla

Tengdar fréttir

Ingunn sú sem var stungin af nemanda sínum

Ingunn Björnsdóttir, dósent í lyfjafræði við Oslóarháskóla, var ásamt samkennara sínum stungin af nemanda í gær. Nemandinn hefur verið handtekinn.

25. ágúst 2023 08:47

Nemandinn sem stakk Ingunni áfrýjar dómi

Lyfjafræðinemi sem stakk Ingunni Björnsdóttur, dósent við Oslóarháskóla, ítrekað hefur áfrýjað hluta dóms sem hann hlaut fyrir verknaðinn. Hann vill fá öryggisvistun sinni hnekkt og dómi vegna árásar á samkennara Ingunnar.

26. september 2024 18:37

Nemandinn sem stakk Ingunni nítján sinnum: Segir „tæknilega séð mögulegt“ að hann geri það aftur

Norski stúdentinn sem stakk Ingunni Björnsdóttur dósent við Óslóarháskóla nítján sinnum í fólskulegri árás á skrifstofu hennar segist ekki hafa átt annarra kosta völ. Hann var ósáttur með kennslu Ingunnar og hafði áhyggjur af því að aðrir nemendur þyrftu að sitja hjá henni kennslustundir.

13. júní 2025 10:50

Kallar eftir sams konar úrræði og Breivik og árásarmaður hennar sæta

Ingunn Björnsdóttir, dósent við Óslóarháskóla og brotaþoli fólskulegrar hnífstunguárás í sama skóla, segir íslenskt réttarkerfi ráðþrota þegar kemur að alvarlegum ofbeldismálum. Sá sem stakk hana sætir svokölluðu „forvaring“, refsiúrræði í Noregi sem heimilar yfirvöldum að halda afbrotamönnum í vistun eftir afplánun fangelsisdóms. Fjöldamorðinginn Anders Behring Breivik sætir sama úrræði.

9. nóvember 2024 11:19