Forsætisráðherra Taílands vikið úr em­bætti

Símtalið umdeilda átti sér stað í miðjum landamæraerjum taílenskra og kambódískra stjórnvalda. Efni þess var lekið og fóru ummæli taílenska forsætisráðherrann um skoðanaglaðan herforingja við kambódíska viðmælanda sinn aðallega fyrir brjóstið á taílenskum íhaldsmönnum. Var Paetongtarn sökuð um að reyna að friðþægja Kambódíumennina.

Afgerandi meirihluti stjórnlagadómstólsins greiddi atkvæði með því að víkja forsætisráðherranum tímabundið úr embætti á meðan rannsakað er hvort hann hafi brotið siðareglur með símtalinu. Paetongtarn fékk fimmtán daga til þess að leggja fram greinargerð til að styðja mál sitt.

Búist er við því að Suriya Jungrungruangkit, varaforsætisráðherra, verði starfandi forsætisráðherra í fjarveru Paetongtarn.

Sjálfur segir forsætisráðherrann að aðeins hafi vakað fyrir honum að verja landið og koma í veg fyrir blóðsúthellingar.

„Ég hugsaði aðeins um hvað ætti að gera til að forðast vandræði, hvað ætti að gera til að komast hjá vopnuðum átökum, til að hermenn yrðu ekki fyrir mannfalli,“ sagði Paetongtarn en kambódískur hermaður féll í skotbardaga á landamærunum í lok maí.

Föðu og frænku komið frá í valdaránum

Paetongtarn er yngsta dóttir Thaksin Shinawatra, fyrrverandi forsætisráðherra landsins. Bæði Thaksin og Yingluck Shinawatra, frænka Paetongtarn, var steypt af stóli sem forsætisráðherra árið 2006 og 2014 og fóru þau í útlegð í kjölfarið.

Thaksin sneri aftur til Taílands fyrir tveimur árum. Hann sætir ákærum fyrir spillingu og að rægja konungsveldið.