For­setinn hressti stelpurnar við: „Hitti al­gjör­lega naglann á höfuðið“

Ísland tapaði 1-0 gegn Finnum og það mátti að vissu leyti enn sjá á leikmönnum þegar þær mættu á æfingu í Thun í dag, þó að sumar væru búnar að finna brosið sitt á ný og hress danstónlist væri í gangi í upphitun.

„Það er þungt yfir mannskapnum í smástund en við höfum leiðir… Í morgun settumst við niður og ræddum leikinn, og svo bara lokum við honum, skiljum við hann og förum strax að fókusa á næsta verkefni. Það er ekkert annað hægt að gera. Það þýðir ekkert að velta sér endalaust upp úr þessu, við þurfum bara að koma okkur aftur á braut og halda áfram,“ sagði Ásmundur við Sýn á æfingasvæðinu en viðtalið við hann má sjá hér að neðan.

Auk Höllu forseta voru á meðal gesta í morgunmatnum á hóteli landsliðsins í dag þeir  Willum Þór Þórsson, forseti ÍSÍ, og Andri Stefánsson, framkvæmdastjóri ÍSÍ, sem og Guðmundur Ingi Kristinsson, mennta- og barnamálaráðherra.

Forsetinn afhenti þeim Hlín Eiríksdóttur, Guðrúnu Arnardóttur og Sveindísi Jane Jónsdóttur viðurkenningu fyrir að hafa náð þeim áfanga að spila 50 leiki fyrir A-landsliðið  og ræddi við leikmenn, og segir Ásmundur það hafa hresst mannskapinn við:

„Hún hélt góða ræðu fyrir stelpurnar og hitti algjörlega naglann á höfuðið með allt sem hún sagði. Algjörlega í takti við það sem þær þurftu að heyra í morgun,“ en Halla var einnig á meðal stuðningsmanna á leiknum við Finna í gær.

„Erum partur af stórri vegferð“

Ásmundur er mættur á sitt þriðja stórmót eftir að hafa aðstoðað Frey Alexandersson á EM í Hollandi 2017 og svo Þorstein Halldórsson á EM í Englandi fyrir þremur árum. Nú nýtur hann lífsins í Sviss:

„Sem fótboltaþjálfari er bara einstakt að fá að fara á stórmót, hvað þá þrjú. Það eru algjör forréttindi. Að sjálfsögðu er þetta gríðarlega spennandi og ótrúlega skemmtilegt. Mjög krefjandi mót og umhverfi, og það er frábært að fá að upplifa það. EM 2017 var strembið en lærdómsríkt, 2022 að sama skapi, og við höldum bara áfram. Þetta er partur af einhverri vegferð. Við höfum verið dugleg að skoða söguna og samhengið í kringum það, mótin sem á undan voru, og við erum partur af einhverri stórri vegferð sem íslensk kvennaknattspyrna er á. Það er heiður og forréttindi að fá að taka þátt í því,“ sagði Ásmundur.

Umræða um TikTok-notkun hjákátleg

Eftir tapið gegn Finnum hefur einhver umræða verið um að stelpurnar séu of virkar á samfélagsmiðlum, líkt og það gæti bitnað á frammistöðu þeirra innan vallar, og Ásmundur hafði sterka skoðun á þessu:

„TikTok og annað snýst bara um að þær geri sig sýnilegar. Þetta er allt bara „genuine stuff“ frá þeim. Ég held að það sé mikilvægt fyrir unga iðkendur að sjá lífið þeirra. Þarna vilja ungar stelpur og strákar vera.

Við vorum nú bara að horfa á heila seríu um sögu kvennaknattspyrnu á Íslandi, þar sem er gegnumgangandi að það er verið að berjast um athygli. Að þær sjáist. Svo loksins þegar þær eru þar þá eiga þær ekki að gera það. Ég held að við séum í pínulítilli þversögn þar.

Stelpurnar eru svo miklir fagmenn í því sem þær gera. Þetta hefur ekkert að segja og truflar ekkert. Það er bara einhver fyrirsláttur í fólki. Við finnum ekki neitt fyrir þessu hér. Þegar þær eru á fundum hjá okkur, æfingum og leikjum, eru þær ON. Það er ekki verið að spá í einhverja samfélagsmiðla. Þetta er bara hjákátlegt.“