Hvernig spyr ég gervi­greind til að fá besta svarið?

Ertu búin(n) að prófa gervigreindina en fékkst ekki alveg þau svör sem þú bjóst við? Margir hafa kynnst ChatGPT, Gemini eða öðrum snjöllum gervigreindum, en lenda í því að fá loðin eða ónákvæm svör. En hvað ef ég segði þér að vandamálið liggur mögulega í því hvernig þú spyrð?

Lykillinn er að vita hvernig maður talar við gervigreind og notar svokallað „prompt“, einfalda beiðni eða fyrirmæli, sem skilar þér miklu betri svörun.

Hvað er „prompt“ og af hverju er það mikilvægt?

Prompt er einfaldlega leiðbeiningarnar sem þú gefur gervigreindinni áður en hún byrjar að svara. Þessu má líkja við það þegar þú pantar mat á veitingastað; því skýrari sem pöntunin er, því líklegra er að rétturinn verði nákvæmlega eins og þú óskaðir þér.

Ef þú segir til dæmis „mig langar í eitthvað gott,“ þá færðu mögulega ekki það sem þig langaði í. Hins vegar ef þú segir „mig langar í steik medium rare, með bearnaise sósu og frönskum“ þá færðu nákvæmlega það sem þú óskaðir þér. Sama regla gildir þegar þú notar gervigreind, skýrleiki skilar árangri.

Skref fyrir skref leiðbeiningar

Hér er einföld leið til að nýta sér gervigreind á skilvirkari hátt með hagnýtum leiðbeiningum sem allir geta notað:

Hver á gervigreindin að vera? (Settu henni hlutverk) Þetta hjálpar gervigreindinni að skilja hvernig hún á að haga sér og svara.

Dæmi:

• „Þú ert ferðaráðgjafi með mikla reynslu af Spáni.“
• „Þú ert næringarfræðingur sem gefur holl og einföld ráð.“

Fyrir hvern eru upplýsingarnar? (Skýrðu markhópinn) Skilgreindu hverjum svörin eiga að gagnast.

Dæmi:

• „Útskýrðu þetta fyrir byrjendum sem kunna lítið á tölvur.“
• „Gefðu ráð sem henta foreldrum með ung börn.“

Hvað viltu ná fram? (Vertu skýr með markmið) Segðu skýrt frá því hvað þú vilt fá út úr samtalinu.

Dæmi:

• „Ég vil lista yfir þrjá staði sem henta vel fyrir fjölskyldufrí á Spáni.“
• „Ég vil ráð til að borða hollara án þess að elda flókinn mat.“

Settu fram skýrar leiðbeiningar (Nákvæm verkefni) Vertu mjög skýr með hvað þú vilt að gervigreindin geri nákvæmlega.

Dæmi:

• „Gefðu mér lista með nafni staðar, lýsingu og kostum og göllum hvers staðar.“
• „Gefðu mér fimm einfaldar uppskriftir sem taka minna en 15 mínútur að undirbúa.“

Veldu framsetninguna (Hvernig viltu fá svarið?) Skýrðu hvernig svarið á að líta út.

Dæmi:

• „Gefðu mér punktalista með stuttum lýsingum.“
• „Gefðu mér greinargóða útskýringu með dæmum.“

Dæmi um fullkomlega uppsett „prompt“

Hér er dæmi sem sýnir hvernig þú getur sett saman skýrt og einfalt prompt sem allir geta notað. Prófaðu að setja þetta beint inn í gervigreindina þína og sjáðu muninn!

• Hlutverk: Þú ert vinsæll matreiðslubloggari.
• Markhópur: Fólk með lítinn tíma til að elda.
• Markmið: Bjóða upp á þrjár uppskriftir sem eru einfaldar, hollar og taka innan við 20 mínútur að undirbúa.
• Verkefni: Lýstu hverri uppskrift með innihaldsefnum og einföldum leiðbeiningum.
• Form: Punktalisti með stuttum lýsingum.

Þetta einfaldar alla vinnu og skilar nákvæmlega því sem þú ert að leita að.

Einföld aðferð, stór munur

Með því að tileinka þér þessa einföldu aðferð geturðu gjörbreytt því hvernig þú notar gervigreind í daglegu lífi. Hvort sem þú ert að leita að einföldum uppskriftum, góðum ráðum fyrir ferðalög eða bara að læra eitthvað nýtt, mun vel skrifað „prompt“ skila þér skýrari, nákvæmari og gagnlegri svörum.

Prófaðu þetta í dag, og þú munt strax finna muninn!

Höfundur er ráðgjafi í nýsköpun og gervigreind.