Þing­maður telur að vísa ætti skvettaranum úr landi

Uppi varð fótur og fit við utanríkisráðuneytið þar sem mótmælandi úr hópnum Ísland-Palestína skvetti rauðri málningu á ljósmyndara Morgunblaðsins sem var þar við störf. Ljósmyndarinn hyggst kæra skvettarann til lögreglu.

„Ég reikna með því að kæra þetta mál. Prinsipplega getum við ekki látið þetta yfir okkur ganga sem stétt,“ segir Eyþór Árnason ljósmyndari í samtali við fréttastofu.

Sá heitir Naji Asar og kom til Íslands frá Grikklandi sumarið 2021 þaðan sem hann flúði nokkru áður frá Palestínu. Fram kom í viðtali við hann í desember 2023 að hann flúði Gasa árið 2018 ásamt föður sínum og þremur frændum á grunnskólaaldri.

Þá stóð hann fyrir tjaldbúðum ásamt fleiri Palestínumönnum á Austurvelli og kölluðu eftir því að stjórnvöld beittu sér fyrir því að fjölskyldumeðlimir hans, sem hefðu fengið dvalarleyfi á grundvelli fjölskyldusameiningar, kæmust til Íslands.

Fjölmargir hafa fordæmt skvettu Asar í gær, samtökin Ísland-Palestína hafa harmað atvikið í yfirlýsingu auk þess sem Blaðamannafélag Íslands og Blaðaljósmyndarafélag Íslands hafa sagt gjörningin skelfilegan.

Asar hefur sagt á Instagram að um brandara hafi verið að ræða hjá Palestínumanni, föstum á Íslandi, sem þrái ekkert heitar en að geta lifað eðlilegu lífi í Palestínu. Tilefni skvettunnar virðist hafa verið ósætti við umfjöllun Morgunblaðsins um ástandið á Gasa.

Vilhjálmur Árnason, þingmaður Sjálfstæðisflokksins, segir grafalvarlegt þegar ráðist sé á fjölmiðlamenn.

„Slík framkoma er árás á tjáningarfrelsið og það lýðræðissamfélag sem Ísland svo sannarlega er,“ segir Vilhjálmur.

„Í þessu tilfelli er um að ræða palestínskan flóttamann sem hefur áður viðurkennt að hafa verið handtekinn í tengslum við mótmæli, og nú hefur hann aftur brotið alvarlega af sér. Slíkt er ekki aðeins brot á lögum, það er algjör vanvirðing við þau gildi sem við byggjum íslenskt samfélag á.“

Vísar Vilhjálmur til þess að Asar hefur áður verið handtekinn vegna mótmæla hér á landi.

„Þegar fólk fær að njóta þeirra forréttinda að fá vernd í einu friðsælasta og frjálslyndasta samfélagi heims, þá fylgir því einnig sú skylda að virða lög og reglur og taka þátt í samfélaginu af ábyrgð. Þeir sem ekki treysta sér til þess, eiga ekki að njóta áframhaldandi verndar.“

Vilhjálmur telur ljóst að samfélagið þurfi að setja skýrari mörk, löggjöf og framkvæmd hennar þurfi að vera skýrari og ákveðnari. Vísar hann til væntanlegs frumvarps dómsmálaráðherra þess efnis að hægt verði að afturkalla alþjóðlega vernd þegar fólk brjóti alvarlega af sér hér á landi. Það sé ekki nóg.

„Við verðum að ganga lengra en fyrirhugað frumvarp dómsmálaráðherra gerir ráð fyrir. Þegar Alþingi kemur saman að nýju verður að endurskoða reglur um dvalarleyfi þeirra sem brjóta af sér, þannig að hægt verði að vísa þeim úr landi. Ekki aðeins þegar um er að ræða verstu glæpi, heldur einnig þegar menn ógna öryggi og friði samborgara sinna. Þessi framkoma gagnvart okkar friðsæla samfélagi er til skammar.“