Skinkur og Sykurpabbar skemmta sér á Egils­stöðum

Í tilkynningu frá UMFÍ segir að mótið gangi vel enda blíð og still og æðislegt veður.  Willum Þór Þórsson, forseti ÍSÍ, var viðstaddur setninguna og er gestur mótsins ásamt fulltrúum sveitarfélag í Múlaþingi, Fjarðabyggð og víðar.

Keppendur eru á aldrinum 11 til 18 ára og um ellefu hundruð talsins, Mótsgestir eru um fimm þúsund, samkvæmt tilkynningunni. Slíkur sé mannfjöldinn að gestir mótsins dvelji á tveimur stórum tjaldsvæðum.

Keppni í grashandbolta hefur staðið yfir í allan dag, í grasblaki, sundi, frjálsum íþróttum og mörgum fleirum. Í dag var líka keppt í kökuskreytingum, mótorkrossi, hestaíþróttum og mörg fleiru. Svo eru tónleikar í kvöld en síðasti dagur mótsins er á morgun og verður því slitið seint annað kvöld.

Skinkur, Sykurpabbar og Hvítu litlu kjúklingarnir

Í fréttatilkynningu UMFÍ er haft eftir Ástu Dís Helgadóttur veitingastjóra mótsins að hún allar skinkurnar á Egilsstöðum væru uppseldar.

Einu skinkurnar í bænum á Egilsstöðum reyndust til skamms tíma vera liðið Skinkurnar, hópur 11-12 ára stúlkna, sem keppti meðal annars í grasblaki undir merkjum Ungmenna- og íþróttasambands Austurlands (UÍA). Gríðarlegt stuð var í Skinkuhópnum sem voru vel merktar UÍA á vellinum.

Skinkurnar frá UÍA eru langt í frá þær einu sem skíra lið sín skemmtilegum nöfnum. Á mótinu má sjá Sykurpabbana, Þrumurnar, CapyBara, Barca Girls, Bláberin, Orrana, Hrafnana, Litlu hvítu kjúklingana og mörg hress lið.

Töpuðu keppninni en alls ekki góða skapinu

Skinkuleit Ástu Dísar endaði vel þegar leið á daginn og fann hún þetta ágæta álegg í nægu magni fyrir mótsgestina.

Aðra sögu er þó að segja af Skinkunum á íþróttavellinum sem fylltu ekki stigatöfluna og lentu í 12. sæti í sínum flokki. Þær töpuðu samt aldeilis ekki gleðinni enda snýst Unglingalandsmótið um þátttöku og keppni á eigin forsendum. Þar skoruðu Skinkurnar öll stig í boði.