„Það urðu smá á­rekstrar en heilt yfir var þetta ó­trú­lega vel skipu­lagt“

Óánægju gætti innan hlaupasamfélagsins með framkvæmd maraþonsins og heitar umræður mynduðust í Facebook-hópnum „Hlauparar á Íslandi“ þar sem skipulag og skiptingu í flokka var harðlega gagnrýnt.

Sjá einnig: Öll spjót beinast að ÍBR vegna skipulagsleysis og rugls í ræsingu

Ingvar Sverrisson, formaður ÍBR, segir Reykjavíkurmaraþonið í ár hafa tekist einstaklega vel, en vegna breytinga hafi mistök verið gerð við ræsingu.

„Við vorum núna í fyrsta skipti að ræsa í tveimur hollum. Keppnishollið annars vegar og almenna hollið hins vegar. Það sem gerist þarna í ræsingunni um morguninn, þetta klikkar aðeins og tefst örlítið, vegna þess að fólk virðist ekki alveg hafa verið búið að lesa almennilega skilaboðin.

Hollin blönduðust og við vorum kannski ekki alveg búin að átta okkur á því að við þyrftum að passa upp á það myndi ekki gerast“ segir Ingvar og áréttar að breytingum fylgi oft mistök, en þau muni ekki endurtaka sig.

„Þegar það er verið að gera breytingar og prófa nýja hluti, þá gera menn stundum örlítil mistök og það verða einhverjir árekstrar, en við lærum sannarlega af þessu og þetta mun ekki koma fyrir aftur“ sagði Ingvar í Bítinu á Bylgjunni í morgun. 

„Best skipulagða, best mælda og best tímatekna hlaupið á Íslandi“

Ástæðan fyrir þessari skiptingu í almennan- og keppnisflokk er ádeila ÍBR og Frjálsíþróttasambandsins FRÍ.

Ágreiningurinn milli sambandanna nær nokkur ár aftur í tímann en snýst aðallega um að FRÍ vill að hlaupið sé vottað samkvæmt þeirra stöðlum og að allir þátttakendur séu sjálfkrafa skráðir í afrekaskrá FRÍ.

ÍBR finnst óþarfi að láta alla þátttakendur greiða fyrir vottun og skráningu í afrekaskrá FRÍ, þar sem hlaupið er nú þegar vottað af alþjóðasamtökum.

Sameiginlega lausnin sem samböndin fundu var að bjóða upp á hvort tveggja, keppnisflokk sem er skráður í afrekaskrá FRÍ og almennan flokk sem er það ekki og greiðir lægra gjald.

„Við höfum bent á að Reykjavíkurmaraþonið var vottað af alþjóðasamtökum og er í raun best skipulagða, best mælda og best tímatekna hlaupið á Íslandi.

Við höfum sagt það sjálfsagt að þeir sem hafi áhuga á því að fá tíma sína vottaða og skráða í afrekaskrá, til þess að taka þátt í erlendum hlaupum, að þeir myndu greiða fyrir það einhverjar krónur. En við vildum ekki endilega, afþví að hlaupið er líka lýðheilsuviðburður og söfnunarviðburður, að þessir aðilar séu rukkaðir sérstaklega fyrir að komast í afrekaskrá…

Þá var eðlilegt að við myndum skipta þessu upp og það varð niðurstaðan, hjá báðum. Nú förum við yfir þetta, það urðu smá árekstrar en heilt yfir var þetta ótrúlega vel skipulagt“ segir Ingvar en viðurkennir mistök við ræsingu.

„Við töldum að við gætum ræst þetta saman. Við höfum áður skipt í hraðahólf og hefðum getað gert þetta þannig. En það var ekki vilji fyrir því og þá var þetta niðurstaðan.“