Vann fyrir opnum tjöldum hjá bæði sak­sóknara og PPP

Hann var kallaður til yfirheyrslu hjá Lögreglunni á Suðurlandi í sumar, sem fer með rannsókn á því hvernig gögnum var lekið frá embætti sérstaks saksóknara til PPP.

Í frétt Morgunblaðsins segir að Heiðar Þór hafi unnið fyrir Opin kerfi og verið verktaki hjá sérstökum saksóknara. Hann hafi þó verið ráðinn þangað í fulla vinnu í árslok 2012. Þá segir í frétt Mbl að miðillinn hafi heimildir fyrir því að hann sé ekki í leyfi, þótt hann hafi stöðu sakbornings hjá Lögreglunni á Suðurlandi.

Sjá einnig: Starfsmaður Héraðssaksóknara með stöðu sakbornings

Málið má rekja til þess að í vor var fjallað um það í Kveik á Rúv að tveir fyrrverandi starfsmenn saksóknaraembættisins, þeir Jón Óttar Ólafsson og Guðmundur Haukur Gunnarsson, hafi hætt hjá embættinu í lok árs 2011 og stofnað njósnafyrirtækið PPP sf.

Voru þeir taldir hafa stolið gögnum frá embættinu. Kært var fyrir þennan meinta stuld en málið var fellt niður af Ríkissaksóknara.

„Þetta var fyrir opnum tjöldum“

Í viðtali við Frosta Logason á Brotkasti í maí sagði Jón Óttar frá því að Heiðar Þór hefði unnið fyrir bæði PPP og sérstakan saksóknara fyrir opnum tjöldum.

„Við vorum að vinna fyrir Ólaf sjálfan og þetta vissu allir, þetta var fyrir opnum tjöldum. Og ekkert leyndarmál. Tölvumaðurinn sem vann fyrir PPP var Heiðar Þór Guðnason aðaltölvumaðurinn hjá Sérstökum saksóknara. IT-gaur. Hann sá ekki bara um tölvukerfið heldur gögnin,“ sagði Jón Óttar í maí og sagði að Heiðar Þór gerði það enn.

Hann sagði Heiðar Þór hafa verið aðaltæknimanninn í tölvukerfi sem allir hafi notað til að rannsaka tölvupósta. Hann hafi séð um öll þau gögn og það sem meira var, hann hafði aðgengi að öllum tölvum.