Nanna Rögnvaldardóttir hlýtur verð­laun Guð­rúnar Helga­dóttur

Verðlaunin eru veitt árlega fyrir óprentað handrit að barna- eða ungmennabók og er ætlað að hvetja til metnaðarfullra skrifa fyrir börn og ungmenni og halda á lofti merkjum eins okkar ástsælasta barnabókahöfundar. Verðlaunahandritið kemur út hjá Forlaginu í næsta mánuði.

Alls bárust 71 handrit undir dulnefni í ár, og bar handrit Nönnu sigur úr býtum en Heiða Björg Hilmisdóttir, borgarstjóri, afhenti henni verðlaunin, og minntist í athöfninni Guðrúnar Helgadóttur, sem lést árið 2022, og hennar mikilvæga framlags til barnabókmennta.

Reyndur höfundur skrifar fyrstu barnabókina

Nanna Rögnvaldardóttir hefur skrifað fjölda bóka um matargerð og matarsögu, þar á meðal stórvirkið Matarást sem var tilnefnt til Íslensku bókmenntaverðlaunanna. Einnig hefur hún skrifað bækur um íslenska matargerð á ensku.

Fyrsta skáldsaga Nönnu, Valskan, kom út árið 2023 en frásögnina byggði hún á lífi formóður sinnar og fléttaði þar saman heimildum og skáldskap svo úr varð saga um harða lífsbaráttu, þrautseigju og ástir. 

Hún sendi síðan frá sér sögulegu glæpasöguna Þegar sannleikurinn sefur í fyrra. Sagan gerist á hvömmum og byggir atburðarás hennar lauslega á þekktu morðmáli frá árinu 1704. Sjálfstætt framhald bókarinnar er væntanlegt í haust. 

Nanna er jafnframt ötull þýðandi og starfaði lengi við bókaútgáfu hjá Iðunni og Forlaginu.

„Þessi viðurkenning er mér mjög dýrmæt, ekki aðeins vegna þess að ég þekkti Guðrúnu, kom að sumum bóka hennar á vinnslustigi og mat hana ætíð mikils, heldur einnig vegna þess að sagan mér tækifæri á að fjalla um tímabil sem er mér afar hugleikið frá nýju sjónarhorni – séð með augum barns sem þarf að takast á við ótrúlega erfiðar aðstæður en upplifir líka gleði, spennu og ást,“ sagði Nanna um verðlaunin.

Flóttinn á norðurhjarann

Flóttinn á norðurhjarann fjallar um mæðgur sem þurfa að flýja erfiðar aðstæður og takast á við margar hindranir í leit sinni að betra lífi. Sagan gerist undir lok 18. aldar í kjölfar Móðuharðindanna og margvíslegra erfiðleika af þeirra sökum.

Söguhetjan er tólf ára gömul stúlka í upphafi sögunnar og er hún alfarið sögð frá hennar sjónarhorni sem gerir lesendum auðveldara að setja sig í hennar spor.

„Aðalpersónan, Solla, var formóðir mín og það gerði söguna enn mikilvægari fyrir mér,“ segir Nanna.

Þorgeir Ólafsson, Ragnheiður Gestsdóttir og Jónella Sigurjónsdóttir sátu í þriggja manna dómnefnd verðlaunanna og var einróma álit dómnefndar að handrit Nönnu væri best.

„Sagan er vel skrifað á góðu máli sem ekki er fornlegt eða stirt þrátt fyrir að sagan gerist fyrir meira en tvö hundruð árum. Sögupersónur eru vel skapaðar og trúverðugar og við kynnumst þeim þegar sögunni vindur fram og þær þurfa að bregðast við margvíslegum raunumm,“ segir í umsögn dómnefndar.