Þurfti þrjú spor eftir á­rekstur við rútu lands­liðsins

Hinn 25 ára gamli Haaland hefur skorað 42 mörk í 43 A-landsleikjum fyrir Noreg og stefnir eflaust á að bæta við þann fjölda gegn Moldóvu í undankeppni HM 2026 annað kvöld. Um tíma var hins vegar efast um þátttöku framherjans kraftmikla eftir að hann þurfti að láta sauma þrjú spor í andlit sitt.

Ekki er vitað nákvæmlega hvað gerðist en Haaland sjálfur birti tvær myndir af sér á samfélagsmiðlinum Snapchat.

Undir þeirri fyrri stendur hreinlega „Góðan daginn,“ og svo má sjá mynd af honum með skeifu á sjúkrabekk norska landsliðsins. Reikna má með að það hafi verið stuttu eftir að atvikið átti sér stað enda Haaland enn í æfingafatnaði norska landsliðsins.

Á síðari myndinni sem hann birti segist hann hafa þurft þrjú spor eftir að hafa rekið andlitið í hurðina á rútu landsliðsins. Engar frekari upplýsingar um atburðarásina fylgja né hvernig hurð rútunnar hefur það.

Haaland hefur byrjað tímabilið af krafti og skorað þrjú mörk í fyrstu þremur deildarleikjum Manchester City. Einnig skoraði hann sigurmark Noregs í 1-0 sigrinum á Finnlandi á fimmtudaginn var.