Mamma reddaði treyjunum frá Thuram bræðrunum

Daníel skoraði bæði mörk Malmö um helgina þegar liðið gerði 2-2 jafntefli við Elfsborg á útivelli. Daníel skoraði fyrra markið sitt á 8. mínútu úr vítaspyrnu og fagnaði með því að benda á Guðjohnsen-nafnið, á vellinum sem bróðir hans Sveinn Aron Guðjohnsen lék á þegar hann var leikmaður Elfsborg. Daníel bætti svo við öðru marki með laglegu skoti á 33. mínútu.

„Auðvitað var bara geggjað að skora tvö mörk en svekkjandi hvernig leikurinn endaði,“ segir Daníel í sportpakkanum á Sýn í gærkvöldi. Daníel fór fram akademíu Real Madrid yfir til akademíu Malmö árið 2022 en var síðan tekinn upp í aðalliðið ári seinna.

„Mér fannst þetta vera gott skref fyrir mig.“

Man lítið eftir þessu

Daníel lék á dögunum sinn fyrsta landsleik gegn Azerbaijan og byrjaði með íslenska landsliðinu gegn Frökkum á Parc de Princes nokkrum dögum seinna. Andri Lucas Guðjohnsen bróðir hans var einnig í byrjunarliðinu.

„Þetta var þvílík upplifun og heiður. Það var svo mikið af tilfinningum þarna og bara algjörlega geggjað. Í mínu fyrsta landsliðsverkefni og að bróðir minn sé þarna hjálpar rosalega.“

En þeir bræður fengu treyjurnar frá þeim Khéphren og Marcus Thuram eftir leikinn í París. Móðir þeirra Ragnhildur Sveinsdóttir var í stúkunni en hún þekkir vel til Thuram bræðranna. En mamma þeirra passaði Thuram bræðurna þegar Lilian Thuram og Eiður Smári léku saman hjá Barcelona. Thuram eldri var hjá félaginu frá árinu 2006 til ársins 2008.

„Ég var náttúrlega svo ungur að ég man varla eftir því. En þegar Pabbi var að spila í Barcelona þá var pabbi þeirra líka þarna. Og það var mjög oft sem það var einhver útileikur eða eitthvað og þá voru strákarnir heima hjá okkur og mamma að passa þá.“