Þáttur Kimmel af sjón­varps­skjánum um ó­á­kveðinn tíma

Í tilkynningu frá ABC, sem sendir út þáttinn Jimmy Kimmel Live!, segir að þátturinn verði ekki tekinn upp um óákveðinn tíma. Tilkynningin kemur í kjölfar tilkynningar frá Nexstar Media, einum stærsta eiganda sjónvarpsstöðva í Bandaríkjunum, sem sagðist ætla ekki að senda út þætti Kimmels „í fyrirsjáanlegri framtíð, frá og með þættinum í kvöld.“

Ástæðan eru ummæli Kimmel í þætti hans á mánudagskvöld um morðið á Charlie Kirk, áhrifavaldi og bandamanni Donalds Trump Bandaríkjaforseta, sem var skotinn til bana þann 10. september. Kimmel sagði að nú myndu bandamenn Trump gera allt til að vinna sér inn pólitísk stig eftir morðið á Kirk.

Sjá nánar: Hver var Charlie Kirk?

Þessi gagnrýni féll ekki vel í kramið hjá Nextar sem sögðust ætla að sýna aðra þætti á vegum ABC í stað þætti Kimmel. ABC gekk því skrefinu lengra og verður Kimmel ekki sjónvarpað í óákveðinn tíma. 

„Við teljum ekki að [ummælin] endurspegli skoðanir, viðhorf eða gildi samfélagsins okkar,“ segir Andrew Alford, forseti útsendingardeildar Nexstar, í umfjöllun BBC.

Jimmy Kimmel Live! eru klukkustunda langir spjallþættir sem hafa verið sendir út frá árinu 2003. Þættirnir voru fyrst, líkt og nafnið gefur til kynna, sendir út í beinni útsendingu en var því breytt árið 2004 eftir að leikarinn Thomas Jane sagði fjöldan allan af blótsyrðum sem ekki var hægt að ritskoða.

Fréttin hefur verið uppfærð.