Annar full­trúa Fram­sóknar hættur í bæjar­stjórn Kópa­vogs

Sigrún Hulda skipaði annað sæti framboðslista Framsóknar fyrir sveitarstjórnarkosningarnar árið 2022. Hún var þá leikskólastjóri heilsuleikskólans Urðarhóls. 

Hún óskaði eftir tímabundinni lausn frá störfum frá 1. október í fyrra til 31. ágúst. Björg Baldursdóttir hefur setið sem aðalmaður í bæjarstjórn síðan þá. Ekki kom fram í fundargerðinni hvers vegna Sigrún Hulda hefði óskað lausnarinnar.

Svo virðist sem að Sigrún Hulda hafi þá verið ráðin sem deildarstjóri leikskóladeildar bæjarins. Hún er titluð sem slíkur í fundargerð leikskólanefndar 31. október í fyrra en engin tilkynning virðist hafa birst á vef bæjarins um ráðninguna.

Varanleg afsögn Sigrúnar Huldu tók gildi 1. september. Ástæður hennar eru sagðar persónulegar í bréfi hennar til bæjarstjórnar.