Breyta eftir­liti með hraða í Fáskrúðs­fjarðargöngum

Göngin eru tæplega sex kílómetra löng og tengja saman Fáskrúðsfjörð og Reyðarfjörð. Þau voru opnuð árið 2005 og þremur árum síðar voru hefðbundnar hraðamyndavélar teknar í notkun í göngunum. Nú breytist eftirlitið með sama hætti og það hefur breyst í Hvalfjarðargöngunum.

„Sjálfvirkt hraðaeftirlit er ein af megináherslum í umferðaröryggisáætlun stjórnvalda. Hraðamyndavélar eru fyrst og fremst settar upp á köflum þar sem slys eru mörg, en einnig er lögð áhersla á að setja slíkan búnað upp í jarðgöngum til að draga úr líkum á að slys verði,“ segir í tilkynningu á vef Vegagerðarinnar.

Sjálfvirkt meðalhraðaeftirlit byggir á því að meðalhraði ökutækis sem fer tiltekna vegalengd er reiknaður út með því að deila í vegalengdina með tíma. Þá vinna tvær myndavélar saman fyrir hvora akstursstefnu, þar sem önnur er staðsett í byrjun kaflans en hin í enda kaflans. 

Teknar eru myndir af öllum ökutækjum og búnaðurinn greinir hversu lengi ökumaður var að aka á milli myndavélanna og reiknar þannig út meðalhraða ökutækisins á kaflanum. Ef útreiknaður hraði er meiri en leyfilegt er telst viðkomandi ökumaður brotlegur. Embætti lögreglustjórans á Vesturlandi sér um frekari úrvinnslu og álagningu sekta. Öll gögn eru dulkóðuð og myndir af þeim sem ekki eru brotlegir eyðast sjálfkrafa í myndavélunum. 

Skilti sem gefa eftirlitið til kynna hafa verið sett upp beggja vegna ganganna.