Bara tala kynnti „Bare si det“ til leiks í Noregi

Bare si det byggir á sama grunni og íslenska útgáfan Bara tala sem fyrirtæki, stofnanir og sveitarfélög á Íslandi hafa nýtt til að styðja við íslenskunám fólks með annað móðurmál en íslensku með það að markmiði að stuðla markvisst að aukinni þátttöku þeirra í samfélaginu, auknu sjálfstraust og aðgengi að vinnumarkaði.

Í tilkynningu frá Bara tala segir að Högni Kristjánsson, sendiherra Íslands í Noregi og eiginkona hans Ásgerður Magnúsdóttir hafi verið gestgjafar viðburðarins.

„Chisom Udeze, stofnandi og framkvæmdastjóri Diversify kom fram á viðburðinum og talaði um mikilvægi aðgengis að tungumáli fyrir þátttöku innflytjenda í samfélaginu til að stuðla að jafnrétti. Rita Anson, verkefnastjóri hjá NorBAN og Nordic Ignite kom einnig fram og ræddi tenginguna milli fjölbreytni, nýsköpunar og þróunar lausna á vinnumarkaði,“ segir í tilkynningunni.

Jón Gunnar Þórðarson, stofnandi og framkvæmdastjóri Bara tala, kynnti tilurð og framtíðarsýn lausnarinnar Bare si det og sagði frá fyrstu skrefunum í Noregi sem hafa gengið vonum framar.

„Við erum ótrúlega stolt af því að stíga þetta skref að opna Bare si det og vonumst til að geta stutt við nýbúa og fyrirtæki í Noregi með notendavænu og starfstengdu tungumálanámi,“ er haft eftir Jóni Gunnari. Ráðgjafafyrirtækið FOLKA AS, sem sérhæfir sig í lausnum í mannauðsmálum til fyrirtækja, eru endursöluaðilar á lausninni Bare si det fyrir Noregsmarkað.

Jón greindi einnig frá því að Bara tala ehf réði nýlega markaðs og sölustjóra í Noregi. Marcus Øien, sem starfaði áður sem sölu og markaðsstjóri hjá Capeesh, fyrirtæki sem sérhæfði sig í menntatæknilausnum fyrir vinnumarkaðinn tekur við stöðunni. „Hans þekking og reynsla er gríðarlega verðmæt fyrir fyrirtækið okkar á nýjum markaði,” segir Jón Gunnar.