Selenskí heldur ró sinni og hyggst ræða við Trump

Hann segist munu ræða drögin við Donald Trump Bandaríkjaforseta á næstu dögum.

Selenskí virðist hafa ákveðið að taka þróun mála á diplómatískan hátt, þrátt fyrir að drögin hafi verið gagnrýnd fyrir að uppfylla óskalista Rússa á kostnað Úkraínumanna. Forsetinn sagði í daglegu ávarpi sínu í gærkvöldi að Úkraína myndi ekki gera neitt til að skemma fyrir friðarferlinu.

„Úkraína þarfnast friðar og Úkraína mun gera allt til að enginn í heiminum geti haldið því fram að við séum að eyðileggja fyrir ferlinu. Það er mikilvægt,“ sagði forsetinn. Úkraínumenn myndu ekki senda frá sér vanhugsaðar yfirlýsingar.

Selenskí forðast þarna að falla í þá gildru að fordæma viðleitni Bandaríkjamanna, sem hefði eflaust bæði reitt Trump til reiði og gefið Vladimir Pútín Rússlandsforseta tilefni til að gagnrýna yfirvöld í Úkraínu og bandamenn þeirra og ásaka þá um að vilja ekki frið.

Aðrir embættismenn í Úkraínu hafa hins vegar fordæmt drögin harðlega, enda kveða þau á um að Úkraínumenn komi til móts við svo til allar kröfur Rússa. Þar á meðal má nefna eftirgjöf landsvæðis og stórfelld inngrip inn í sjálfræði Úkraínu.

Úkraínumenn þyrftu að lofa því að takmarka herafla sinn við 600 þúsund menn og samþykkja að ganga aldrei í Atlantshafsbandalagið. Þá myndi samkomulag fela í sér að engir erlendir hermenn yrðu staðsettir í Úkraínu, sem kæmi í veg fyrir friðargæslu í landinu.

Bent hefur verið á að Rússar virðist hafa átt frumkvæði að því að leggja fram umrætt samkomulag nú, þegar Selenskí er að glíma við viðkvæmt ástand heima fyrir vegna spillingarmáls.