Helmingur hópsins að spila á HM í fyrsta sinn

Ísland er að taka þátt á HM í þriðja sinn en engin er enn í hópnum sem fór til Brasilíu 2011 og mikil endurnýjun hefur átt sér stað síðan í Noregi 2023.

Alexandra Líf Arnarsdóttir, Alfa Brá Oddsdóttir Hagalín, Dana Björg Guðmundsdóttir, Elín Klara Þorkelsdóttir, Katrín Anna Ásmundsdóttir, Lovísa Thompson, Matthildur Lilja Jónsdóttir, Rakel Oddný Guðmundsdóttir og Sara Sif Helgadóttir munu allar þreyta frumraun sína á heimsmeistaramóti í dag.

Dana Björg, Elín Klara og Katrín Anna voru í hópnum sem fór á EM í fyrra en hinar eru að spreyta sig í fyrsta sinn á stórmóti. Elín Klara var reyndar líka í HM hópnum 2023 en meiddist rétt fyrir mót.

Meðalaldur hópsins er aðeins um 24 ár. Aldursforsetinn og leikjahæsta kona hópsins, Thea Imani Sturludóttir, er ekki nema 28 ára gömul. Hún hefur spilað 92 landsleiki. 

Samanlagt hefur um sjö hundruð landsleikja reynsla horfið á braut.

Tveir máttarstólpar verða svo ekki með í leik kvöldsins. Andrea Jacobsen og Elísa Elíasdóttir hafa ekki jafnað sig að fullu af ökkla- og axlarmeiðslum sínum, og verða utan hóps í opnunarleiknum í kvöld.

Andrea er raunar ekki skráð í HM hópinn, sem HSÍ skilaði formlega inn í dag. Hún gæti þó dottið inn á seinni stigum mótsins en það er alls óvíst hvort, hvenær og hvernig hún verður eftir að hafa slitið liðband í ökkla. 

Mikið mun mæða á reynslumeiri leikmönnum liðsins, eins og Theu Imani, fyrirliðanum Söndru Erlingsdóttur, markmanninum Hafdísi Renötudóttur og skyttunni Díönu Dögg Magnúsdóttur.

Elín-urnar tvær, Klara og Rósa, eru þrátt fyrir ungan aldur að komast hratt á þann stall líka enda lykilleikmenn í landsliðinu síðustu ár og eiga báðar eftir að vera í stóru hlutverki á HM.

Lovísa Thompson gæti gert sig gildandi en hún er mætt aftur í landsliðið eftir langa fjarveru og erfiðleika eftir krefjandi meiðsli.

Katrín Tinna Jensdóttir fær stórt hlutverk á línunni í fjarveru Elísu Elíasdóttur, og deilir stöðunni með Alexöndru Líf Arnarsdóttur sem er mætt á sitt fyrsta stórmót eftir að hafa spilað fyrsta landsleikinn í vor. 

Áhugavert verður samt hvernig íslenska liðið mun tækla þýska liðið sem spilar oft án línumanns. 

Spennandi verður svo að sjá hverjar stíga upp á, stærsta sviði handboltans, í opnunarleik HM undir skærum ljósum í stútfullri höll í Stuttgart.

Afar ólíklegt er að þó sigur skili sér gegn ógnarsterkum þýsku liði en stefnan er sett á að sýna góða frammistöðu og stríða þeim sem mest.

Leikurinn mun því vonandi nýtast liðinu til uppbyggingar fyrir næstu leiki gegn Serbíu og Úrúgvæ, þar sem stefnan er sett á sigur og áframhald í milliriðil. 

Opnunarleikur Þýskalands og Íslands hefst klukkan 17:00 og verður í beinni textalýsingu á Vísi.