Fær­eyingar í skýjunum: „Sennilega besti leikur sem ég hef spilað“

Jana Míttun skoraði tvö síðustu mörk færeyska liðsins í leiknum í gær og sex mörk alls. Hún réði sér ekki fyrir kæti í leikslok.

„Þetta er sennilega besti leikur sem ég hef nokkru sinni spilað. Líka með stuðningsmönnunum okkar; þetta var frábært,“ sagði Míttun sem leikur með Viborg í Danmörku.

„Þetta er fyrsta heimsmeistaramótið okkar og við vorum ekki sigurstranglegra liðið. Okkur langaði að koma á óvart og mér fannst að við höfum gert það.“

Jana er systir Óla Míttun sem leikur með karlalandsliði Færeyja og GOG í Danmörku. Jana hefði verið til í að hafa bróður sinn í stúkunni.

„Ég vildi óska þess að hann væri hér. Aftur á móti eru margir úr fjölskyldu minni hér og við þekkjum næstum alla stuðningsmennina.“

Draumur sem rættist

Pernille Brandenborg, sem var markahæst í færeyska liðinu með sjö mörk, var í álíka mikilli sigurvímu eftir leikinn.

„Stutta svarið er nei,“ sagði Brandenborg aðspurð hvort hún skildi hvað hefði gerst.

„Ég er næstum búin að missa röddina af fagnaðarlátum. Þetta var algjörlega frábært og draumur sem rættist.“

Eftir sigurinn í gær eru Færeyjar svo gott sem komnar í milliriðla á HM. Ef færeyska liðið vinnur það paragvæska á morgun fer það með tvö stig í milliriðil.

Líklegt er að Ísland og Færeyjar verði saman í milliriðlinum en Íslendingar komast þangað svo lengi sem þeir tapa ekki fyrir Úrúgvæum á morgun.