„Smá glóðar­auga og nokkrar skrámur“

„Við erum að melta þetta og fara í gegnum tilfinningarnar en við ætlum bara að henda þessu frá okkur því það er annar leikur á morgun“ sagði Thea á hóteli landsliðsins áðan.

„Leikurinn kláraðist mjög seint í gær þannig að það var mikilvægast að ná í sig næringu og fara að sofa, þannig að flestar voru bara inni á herbergjunum að reyna að sofna. Svo tökum við fund í dag og lokum leiknum þar“ bætti hún svo við.

„Mjög miklir tuddar“

Thea var svolítið tekin til augnanna eftir slaginn við Serbana í gær.

„Já smá glóðarauga og nokkrar skrámur en það gerir ekkert til. Þær voru mjög miklir tuddar og við vorum kannski aðeins of seinar að fara á sama plan og þær. En við náðum að gera það í lokin.“

Næsti leikur Íslands er gegn Úrúgvæ á morgun og miðað við mismunandi frammistöður liðanna í fyrstu tveimur leikjunum gegn Þýskalandi og Serbíu ætti Ísland að vinna þann leik.

„Ég er búin að fylgjast aðeins með leikjunum þeirra og svo munum við funda á eftir en það er mjög stórt tækifæri að ná í sigur“ sagði Thea en viðtalið við hana má sjá hér fyrir neðan.