„Við getum tekið þá alla“

Sá fyrsti af þeim þremur fer fram síðar í dag, gegn Svartfjallalandi, og Ísland mætir svo Spáni á fimmtudag og Færeyjum á laugardag.

„Frábært að fá þrjá svona góða leiki, við getum tekið þá alla og við getum tapað þeim öllum, það fer svolítið eftir því hvernig við mætum í leikina“ bætti Sandra við og var þá spurð hvernig liðið ætli sér að mæta til leiks gegn Svartfjallalandi.

„Þær eru svolítið líkar Serbunum [sem Ísland tapaði fyrir með einu marki í síðustu viku.] Þær eru með stóra og góða skyttu, hraðan miðjumann og svo þungan og sterkan línumann. Þannig að við þurfum aðeins að finna jafnvægið, hvenær við ætlum að mæta og hvenær við ætlum að halda niðri. Svo þurfum við að vera skynsamlegar sóknarlega og sjá hvert það leiðir okkur“ svaraði Sandra þá.

Sandra var markahæst hjá Íslandi í riðlakeppninni og átti sérstaklega góðan síðasta leik gegn Úrúgvæ, þar sem hún skoraði 6 mörk og gaf 4 stoðsendingar, þannig að hún mætir í banastuði í milliriðilinn.

„Klárlega, maður er ekki að spila í íslensku landsliðstreyjunni á hverjum degi þannig að maður reynir að nýta sínar mínútur vel“ sagði fyrirliðinn.

Hópurinn hefur verið saman í tvær vikur núna, viku á Íslandi/Færeyjum og viku í Stuttgart, en stelpurnar okkar eru ekki komnar með leið á hvorri annarri.

„Yndislegt að fá að kynnast öllum þessum yngri stelpum sérstaklega, þær sem maður þekkti minna, og svo er maður líka bara með sínum bestu vinkonum hér. Þannig að þessi hópur hefur blandast mjög vel saman. Þessar vikur hafa skilað miklu og það er mikill munur á fyrsta verkefninu miðað við núna. Yngri leikmenn eru farnir að tjá sig meira og taka pláss, sem er mikilvægt.“

Ísland mætir Svartfjallalandi í fyrsta leik milliriðlakeppninnar, í Westfalen höllinni í Dortmund, klukkan fimm. Leikurinn verður í beinni textalýsingu á Vísi.

Viðtalið við Söndru má sjá í spilaranum að ofan.