Kári og Logi vilja henda Ými út úr lands­liðinu

Snorri Steinn mun þá segja frá vali sínu og verður blaðamannafundurinn í beinni hér á Vísi.

Það er ljóst að margir leikmenn íslenska liðsins eru öruggir með sæti sitt í hópnum en aðrir eru mun tæpari.

Ríkissjónvarpið mun sýna leiki Íslands í beinni eins og áður og RÚV fékk þrjá sérfræðinga sína á mótinu til að velja sinn átján manna EM-hóp. Þetta eru þeir Ólafur Stefánsson, Logi Geirsson og Kári Kristján Kristjánsson.

Það er athyglisvert að skoða hóp þessara þriggja sem hafa farið á ófá stórmótin með íslenska landsliðinu og þekkja liðið og aðstæðurnar inn og út.

Þrettán í hópnum hjá öllum

Þrettán leikmenn voru í hópnum hjá þeim öllum og ættu því að vera nokkuð öruggir með sætið sitt.

Það eru eftirtaldir leikmenn: Björgvin Páll Gústavsson, Viktor Gísli Hallgrímsson, Arnar Freyr Arnarsson, Einar Þorsteinn Ólafsson, Elliði Snær Viðarsson, Elvar Örn Jónsson, Gísli Þorgeir Kristjánsson, Haukur Þrastarsson, Janus Daði Smárason, Orri Freyr Þorkelsson, Óðinn Þór Ríkharðsson, Ómar Ingi Magnússon og Viggó Kristjánsson.

Það ætti því að vera mun meiri vafi um fimm síðustu sætin í hópnum.

Fimm leikmenn standa framar en aðrir því þeir voru í tveimur af þessum þremur hópum. Það eru þeir Andri Már Rúnarsson, Kristján Örn Kristjánsson, Sigvaldi Björn Guðjónsson, Stiven Tobar Valencia og Þorsteinn Leó Gunnarsson.

Fimm standa mun tæpar

Aðrir fimm leikmenn standa hins vegar mun tæpar því þeir voru bara í hópnum hjá einum af þessum þremur sérfræðingum. Það eru þeir Bjarki Már Elísson, Jón Bjarni Ólafsson, Reynir Þór Stefánsson, Sveinn Jóhannsson og Ýmir Örn Gíslason.

Það kæmi verulega á óvart ef Jón Bjarni Ólafsson eða Reynir Þór Stefánsson færu með enda hafa þeir ekki farið á stórmót áður. Hinir þrír hafa verið oft með.

Fastamaður á útileið?

Það vekur vissulega athygli að sjá Ými í þeim tæpasta hópi. Ýmir hefur verið fyrirliði landsliðsins og fastamaður í mörg ár. Bæði Logi Geirsson og Kári Kristján Kristjánsson vilja hins vegar henda honum út úr landsliðinu.

Ýmir hefur verið með í síðustu átta stórmótum íslenska liðsins en hann færði sig frá Rhein-Neckar Löwen til Göppingen fyrir 2024-25 tímabilið.

Kári, sem sjálfur er línumaður, vill frekar veðja á Jón Bjarna Ólafsson, línumann FH-liðsins, en Logi vill frekar taka Svein Jóhannsson, línumann Chambéry í Frakklandi.

Eins og sést á hópnum þessara þriggja sérfræðinga þá er munurinn aðallega tengdur því hvort þeir vilja fleiri í eina stöðu á kostnað annarrar.

Logi vill bara taka tvo leikstjórnendur, Kári vill bara taka einn hægri hornamann og Ólafur vill bara taka tvær hægri skyttur.

Svo er það auðvitað bara Snorri Steinn sem ræður og það verður fróðlegt að sjá hvaða átján leikmenn fá náð fyrir augum hans seinna í dag.