Sjáðu Grinda­vík klúðra viljandi til að vinna lygilegan sigur

Endurkoma Grindvíkinga í lok venjulegs leiktíma var hálfpartinn fáránleg, eins og sjá má í spilaranum hér að neðan.

Njarðvík hafði komist níu stigum yfir, 108-99, og var með boltann þegar rúm hálf mínúta var eftir. Þá átti hins vegar enn margt eftir að gerast.

Khalil Shabazz setti nefnilega niður tvo þrista og Daniel Mortensen þrjú vítaskot. Njarðvíkingar náðu þó enn að halda forystunni og voru 113-110 yfir þegar rúmar fjórar sekúndur voru eftir.

Njarðvík brá þá á það ráð að brjóta á Shabazz og gefa honum tvö víti, og nýta sér þannig það að vera þremur stigum yfir. Shabazz setti niður fyrra vítið sitt en klikkaði svo viljandi á því seinna á meðan sofandi Njarðvíkingar horfðu á Jordan Semple grípa frákastið og jafna leikinn.

Grindavík vann svo eins og fyrr segir í framlengingunni, þó að spennan héldi áfram þar eins og sjá má í spilaranum hér að ofan.

Sigurinn færði Grindavík, sem unnið hefur alla sína leiki nema einn, fjögurra stiga forskot á Val og Tindastól á toppi deildarinnar en Njarðvík er í 10. sæti með átta stig nú þegar tólf umferðir hafa verið spilaðar.