Heimsmeistararnir þurftu að fara í átta tíma rútu­ferð

Danska handboltalandsliðið er ríkjandi Ólympíu- og heimsmeistari í handbolta karla og getur lokað hringnum með því að vinna Evrópumótið seinna í þessum mánuði.

Liðið varð í öðru sæti á EM fyrir tveimur árum og hefur ekki unnið Evrópumótið í fjórtán ár. Á sama tíma hafa Danir unnið tvo Ólympíugull og fjögur HM-gull. Það er því mikið hungur í danska landsliðinu að landa loksins Evrópugullinu.

Liðið er nú á lokasprettinum í undirbúningi sínum fyrir Evrópumótið þar sem þeir spila riðil sinn á heimavelli og mæta Portúgal, Norður-Makedóníu og Rúmeníu í riðlakeppninni.

Annað kvöld ætla Danir að hefja þátttöku sína á fjögurra þjóða móti í handbolta karla, svo kallaðri Gulldeild eða Golden League. 

Mikil snjókoma og harður vetur veldur dönsku handboltaherrunum aftur á móti vandræðum fyrir leikinn gegn Noregi en norska ríkisútvarpið segir frá.

Danirnir höfðu ætlað sér að fljúga frá Billund í Danmörku til Amsterdam í Hollandi á miðvikudag en veðrið setti heldur betur strik í þann reikning.

Því beið þeirra erfiður undirbúningur fyrir leikinn gegn Noregi með átta klukkustunda rútuferð frá Danmörku til Hollands. Einnig var frekari hætta á töfum vegna veðurs.

Danirnir settust í rútuna með stefnu á Holland í dag. Það verður síðan beðið frekari frétta af því hvort þeir á annað borð komist heilu á höldnu alla leið til Hollands.

Hin tvö liðin sem taka þátt í mótinu eru Holland og Grikkland en Hollendingar halda mótið í Almere, sem er rétt hjá Amsterdam.