Greipur telur Trump hafa ruglast á Græn­landi og Ís­landi

Í myndbandi sem Greipur gerði fyrir Guide to Iceland, þar sem hann ber Trump-derhúfu, bendir hann á að víkingarnir hafi nefnt Grænland Grænland svo fólk héldi að landið væri kúl og vildi flytja þangað. Ísland hafi hins vegar verið nefnt Ísland svo Mexíkóar myndu ekki synda hingað.

Greipur segir þetta nokkuð ruglandi, líka fyrir Íslendinga, þar sem Ísland væri nokkuð grænt en það væri líka slatti af ís hérna.

„Ég er nokkuð viss um að þú vildir ekki kaupa Grænland,“ segir Greipur.

„Þetta er bara snjór og ísbirnir og ef þú heldur að raðirnar í Disney World séu langar, bíddu bara þar til þú ferð í áfengisbúðina í Grænlandi.“

Hann segir að hér á landi séu fullt af fallegum konum og einu raðirnar séu hjá sólbaðsstofunum.

„Af því að við viljum vera eins og þú, appelsínugul.“

Myndbandið hefur notið mikillar athygli og þegar þetta er skrifað hafa rúmlega 1,8 milljónir manna horft á það, sem er mun meira áhorf en á öðrum myndböndum Guide to Iceland.