Þetta er á­stæða þess að Ís­land er í efsta sæti í milli­riðlinum

Ísland, Svíþjóð og Slóvenía komu öll með tvö stig með sér úr riðlakeppninni og hafa öll þrjú náð í tvö stig af fjórum mögulegum í fyrstu tveimur leikjum sínum. Króatar komu stigalausir inn í milliriðlinn en hafa unnið báða leiki sína í milliriðlinum.

Ef að lið enda jöfn að stigum er farið eftir árangri í innbyrðis leikjum þeirra liða, til að ákveða í hvaða sæti þau enda.

Hins vegar er það þannig, samkvæmt reglum EHF um Evrópumótið, að þangað til að öllum leikjum í milliriðlakeppninni lýkur þá er liðum EKKI raðað eftir innbyrðis úrslitum heldur eftir heildarárangri.

Stórsigur Íslands í gær kemur liðinu því á toppinn í riðlinum einfaldlega vegna þess að liðið er með bestu heildarmarkatöluna, eða +8. Svíþjóð er með +4, Slóvenía +2 og Króatía -3.

Staða Íslands líka góð innbyrðis

Þegar síðustu tveimur umferðunum lýkur verður hins vegar horft til innbyrðis úrslita og liðunum raðað eftir þeim. Ef miðað væri við þau núna þá væri Ísland í 2. sæti og Svíþjóð á toppnum. Tvö efstu liðin komast í undanúrslit.

Svíar standa nefnilega best að vígi þegar innbyrðis úrslit úr leikjum Íslands, Svíþjóðar, Slóveníu og Króatíu eru skoðuð. Þeir hafa unnið bæði Slóveníu og Króatíu, en tapað gegn Íslandi, og eru því einir með fjögur stig úr þessum innbyrðis leikjum. Þeir eru líka eina liðið sem er búið með alla þrjá leiki sína innbyrðis við þessi lið.

Íslendingar og Króatar eru síðan með einn sigur og eitt tap en Slóvenar án stiga því þeir töpuðu á móti Svíum og hafa ekki spilað við hinar tvær þjóðirnar. Slóvenía er því sem stendur neðst í innbyrðis stigatöflu þessara fjögurra liða með núll stig út úr leikjum við hinar þrjár þjóðirnar.

Ísland stendur vel að vígi í innbyrðis stigatöflunni eftir þennan átta marka stórsigur á Svíum í gærkvöld og aðeins eins marks tap fyrir Króötum. Ísland er því með +7 í innbyrðis markatölunni.

Svíar eru með +4 í innbyrðis markatölu (+8 marka sigur gegn Króatíu, +4 marka sigur gegn Slóveníu, -8 marka tap gegn Íslandi) en yrðu með 0 í markatölu ef Slóvenía dytti út úr pakkanum.

Króatar eru síðan með -7 eftir eins marks sigur á Íslandi og átta marka tap fyrir Svíum, og þurfa að treysta á fleira en eigin úrslit til að komast í undanúrslitin.

Allar þjóðir eiga eftir að spila tvo leiki í þessum milliriðli og það á því mikið eftir að gerast enn þá en það stefnir samt í það að þessi stórsigur á Svíum gæti komið sér afar vel þegar þessi milliriðill er gerður upp.