Ellefu ára strákur verður ó­vænt hluti af setningarhátíð Ólympíu­leikanna

Hinn ellefu ára gamli Riccardo komst óvænt í fréttirnar á Ítalíu í síðasta mánuði þegar fjölskylda hans sagði í hverju hann lenti á leið heim úr skólanum.

Aðstæður hans snertu líka hjörtu Ítala. Riccardo átti ekki pening fyrir aukaálagi á fargjöld sem var sett á vegna Vetrarólympíuleikanna í Mílanó og Cortina og neyddist til að ganga 6 kílómetra heim í frosti og snjó, að sögn fjölskyldu hans.

Honum hefur nú verið boðið að vera í aðalhlutverki á setningarhátíð Vetrarólympíuleikanna á San Siro-leikvanginum í Mílanó. Eftir atvikið hafði Milano Cortina 2026-stofnunin samband við fjölskylduna og bauð drengnum táknrænt hlutverk á opnunarhátíðinni.

Hef aldrei séð hann jafn glaðan

„Ég hef aldrei séð hann jafn glaðan og spenntan,“ sagði móðir hans, Sole Vatalano, við ítalska ríkisútvarpið RAI 1. „Þetta var fallegasta gjöf sem þau hefðu getað gefið honum.“

Stofnunin hefur ekki gefið upp hvers eðlis hlutverk Riccardo, sem sjálfur er í yngri flokka skíðaliði, verður.

Sagan hófst þann 27. janúar þegar Riccardo var á leið heim úr skóla í Belluno-héraði í Veneto-héraði á Norður-Ítalíu.

Þrátt fyrir að vera með hefðbundið miðakort fyrir strætóinn var honum vísað úr strætisvagni Dolomiti Bus þar sem hann var ekki með nýinnleitt „Ólympíufargjald“. Það er aukagjald sem hækkaði verð stakrar ferðar úr 2,50 evrum í 10 evrur á meðan Ólympíuleikarnir stæðu yfir.

Saga Riccardo hefur vakið athygli fjölmiðla um allt land en hún var meðal annars á forsíðu mest selda dagblaðs Ítalíu, Corriere della Sera.

Aukaálagið á fargjöldin, sem gildir frá 23. janúar til 17. mars, hefur bitnað á þeim sem nota strætó af og til, eins og Riccardo, en gildir ekki um handhafa árs- eða mánaðarkorta eða fólk með aðgangspassa að Vetrarólympíuleikunum.

Hann leyfði honum ekki einu sinni að borga

„Vagnstjórinn sagði við hann, ef þú átt ekki pening verðurðu að fara út og ganga heim. Hann leyfði honum ekki einu sinni að borga með fjórum miðum úr búntinu sínu,“ sagði amma drengsins, Chiara Balbinot.

Balbinot, sem er lögfræðingur, hefur lagt fram kvörtun til saksóknaraembættisins á staðnum vegna vanrækslu á barni. Hún sagði að barnabarn sitt hefði komið heim blautt, ískalt og í áfalli eftir að hafa gengið á ísilögðum hjólastíg meðfram aðalveginum en hefði það nú gott.

Strætófyrirtækið sagðist hafa sett á fót nefnd til að rannsaka „ítarlega“ hvað gerðist og að vagnstjóranum, sem starfaði hjá undirverktaka, hefði verið vikið frá störfum.

Balbinot sagði að það væri stærra mál að íbúar á svæðinu þyrftu að bera aukakostnað vegna Ólympíuleikanna.

„Ég get skilið að mismunandi gjaldskrár gildi fyrir ferðamenn og gesti, en að íbúar, sem eiga það eitt að sakast að vera fastir í miðri Ólympíuumferðinni, þurfi líka að borga aukalega er óskiljanlegt,“ sagði Balbinot.