Snoop Dogg sagður fá 61 milljón króna í laun á dag

Þangað er hann kominn til að hvetja bandarísku stjörnurnar sem ætla að reyna að vinna til verðlauna á leikunum. Hinn raunverulegi sigurvegari Ólympíuleikanna er kannski bara Snoop Dogg.

Fréttir hafa borist af því hversu góð laun Snoop Dogg fær til að vera á Ólympíuleikunum.

Alveg eins og á sumarleikunum í París 2024 þá er Snoop Dogg sagður vera að fá fimm hundruð þúsund Bandaríkjadali í laun fyrir hvern dag á leikunum, sem meira en 61 milljón króna inn á bankabókina á dag.

Viðvera Snoop Dogg á leikunum í París vakti mikla athygli og ekki síst í íþróttagreinum sem eru ekki alltaf í sviðsljósinu. Rapparinn heimsótti ekki bara frægasta íþróttafólkið heldur fékk einnig að reyna sig í íþróttum sem sjaldan fá mikla athygli í Bandaríkjunum.

Nú er Snoop Dogg kominn til Mílanó og tilbúinn að endurtaka leikinn. Hinn 54 ára gamli rappari verður heiðursþjálfari bandaríska liðsins á bæði Vetrarólympíuleikunum og Ólympíumóti fatlaðra.

„Snoop er þekktur fyrir ástríðu sína fyrir samfélaginu, leiðsögn og að lyfta ungu fólki upp. Hann mun leggja til sinn einkennandi húmor og hjartahlýju til að hvetja íþróttafólk bandaríska liðsins á leið þess til Vetrarólympíuleikanna og Ólympíumóts fatlaðra í Mílanó Cortina 2026 og víðar,“ sagði talsmaður Ólympíu- og Ólympíumótsnefndar Bandaríkjanna (USOPC) um ráðninguna í desember síðastliðnum.

Starfið er líklega ekki ódýrt heldur en Snoop þénaði samtals níu milljónir dollara í París að sögn NBC eða meira en milljarð í íslenskum krónum. Á sama tíma gaf þýski miðillinn Bild einnig í skyn að rapparinn gæti hafa þénað allt að fimmtán milljónir dollara þökk sé bónusi fyrir sjónvarpsáhorf. 

Rapparinn fær nefnilega einnig bónusa takist honum vel upp við að auka áhorf á keppnisviðburði á leikunum. NBC veðjar á að vinsældir Snoop Dogg skili sér til baka í áhorfi og auglýsingatekjum.

Nákvæm þóknun hans fyrir leikana í Mílanó hefur ekki verið gefin upp, en líklegt er að honum verði greitt nokkurn veginn það sama fyrir átján daga sína á Ítalíu.

Þótt kostnaðurinn við að hafa Snoop á Vetrarólympíuleikunum sé ekki lítill vonast USOPC líklega til þess að nærvera hans muni laða að yngri áhorfendur með memum og myndböndum.

Og hann hefur greinilega ekki sóað neinum tíma við að hefjast handa, þar sem „Snoop þjálfari“ hefur þegar deilt myndbandi af sjálfum sér á samfélagsmiðlum þar sem hann reynir að renna sér á sleða, með litlum árangri.

Maður getur aðeins ímyndað sér hvers konar uppátækjum hann mun taka þátt í á næstu vikum.