Stjarnan hætti að skora á versta tíma

ÍBV vann 31-29 sigur eftir spennandi leik. Stjarnan var með undirtökin stóran hluta fyrri hálfleiks en eftir hlé skiptust liðin á að skora og munurinn fór vart yfir tvö mörk.

Stjarnan komst 28-27 yfir þegar tíu mínútur voru eftir en þá tók við tíu mínútna kafli hjá liðinu án marks.

Eyjakonur skoruðu fjögur til að komast 31-28 yfir og það var ekki fyrr en á lokasekúndunni sem Stjarnan skoraði 29. markið er Eva Björk Davíðsdóttir skoraði sárabótamark.

Birna Berg Haraldsdóttir var markahæst Eyjakvenna með tíu mörk úr 14 tilraunum en Ásta Björt Júlíusdóttir skoraði sex úr jafnmörgum skotum. Natasja Hammer skoraði sjö fyrir Stjörnuna en Eva Björk og Inga Maria Roysdóttir sex hvor.

ÍBV er með 28 stig eftir sigurinn í öðru sæti, tveimur stigum á eftir Val sem vann nauman sigur á ÍR.

Stjarnan er með fimm stig í sjöunda og næst neðsta sæti, sem er umspilssæti um að leika í efstu deild að ári. Stigi neðar á botninum er lið Selfoss en neðsta liðið fellur beint í næst efstu deild.