„Þeir sem virðast sterkastir geta samt verið að heyja ó­sýni­legar innri baráttur“

Malinin, sem hjálpaði Bandaríkjunum að tryggja sér gullverðlaun í liðakeppninni snemma á Vetrarólympíuleikunum, var talinn langlíklegastur til að bæta við öðru gulli í einstaklingskeppninni en hann datt tvisvar og átti í erfiðleikum í frjálsa prógramminu sínu á föstudag og endaði í áttunda sæti.

Hann viðurkenndi á eftir að álagið á Ólympíuleikunum hefði bugað hann og sagði: „Ég vissi eiginlega ekki hvernig ég ætti að takast á við það,“ sagði Malinin.

„Á stærsta sviði heims geta þeir sem virðast sterkastir samt verið að heyja ósýnilegar innri baráttur,“ skrifaði hinn 21 árs gamli Malinin. 

Illgjarnt hatur á netinu ræðst á hugann

„Jafnvel ánægjulegustu minningarnar geta spillst af hávaðanum. Illgjarnt hatur á netinu ræðst á hugann og ótti lokkar hann inn í myrkrið, sama hversu mikið þú reynir að halda geðheilsunni í gegnum endalaust, óyfirstíganlegt álag. Allt hleðst þetta upp á meðan þessar stundir leiftra fyrir augum þínum, sem leiðir til óumflýjanlegs hruns,“ sagði Malinin.

Malinin, sem búist er við að muni keppa um sinn þriðja heimsmeistaratitil í röð í Prag í næsta mánuði, hafði verið ósigraður í fjórtán keppnum í meira en tvö ár. Þótt Malinin virtist alltaf búa yfir yfirnáttúrulegri ró sem ekki samræmdist aldri hans, hafði sonur Ólympíuskautaranna Tatianu Malininu og Romans Skorniakov viðurkennt snemma á Vetrarólympíuleikunum að hann fyndi fyrir pressunni.

Fyrsta skiptið var eftir misjafnt stutt prógramm í liðakeppninni, þegar hann lenti á eftir Yuma Kagiyama frá Japan, sem síðar vann silfur í einstaklingskeppninni. Malinin minntist aftur á álagið á Ólympíuleikunum eftir að Bandaríkjamenn höfðu unnið gullverðlaun í liðakeppninni.

Virtist vera hinn afslappaði og sjálfsöruggi Malinin

En hann virtist vera hinn afslappaði og sjálfsöruggi Malinin sem aðdáendur hans höfðu kynnst eftir að hafa sigrað í stutta prógramminu í einstaklingskeppninni. Hann gerði meira að segja grín að því að hann væri að fara að gera áhættusamt heljarstökk á teppalögðum göngupallinum við kynningu á frjálsa prógramminu sínu.

Prógrammið byrjaði vel með fjórföldu lutz-stökki, en vandamálin hófust þegar hann hætti við fjórfalt axel-stökk. Hann datt tvisvar síðar í prógramminu og einkunnin sem hann fékk var sú lægsta sem hann hefur fengið síðan á U.S. International Classic í september 2022.

Malinin sýndi mikið göfuglyndi á eftir, faðmaði og óskaði hinum óvænta gullverðlaunahafa Mikhail Shaidorov frá Kasakstan til hamingju. Hann svaraði síðan fjölda spurninga frá fréttamönnum af yfirvegun og þroska sem fáir hefðu sýnt við slíkar aðstæður.

„Taugarnar urðu bara yfirþyrmandi“

„Taugarnar urðu bara yfirþyrmandi,“ sagði hann, „og sérstaklega þegar ég fór í byrjunarstellinguna fannst mér eins og allar erfiðu stundir lífs míns hefðu bara byrjað að flæða yfir hugann. Svo margar neikvæðar hugsanir flæddu þar inn og ég réð ekki við það,“ sagði Malinin.

„Það eina sem ég veit er að þetta var ekki besta skautunin mín,“ bætti Malinin við síðar, „og það var örugglega eitthvað sem ég bjóst ekki við. Það er búið, svo ég get ekki farið til baka og breytt því, þótt ég myndi gjarnan vilja það,“ sagði Malinin.